Өфөлә мөмкинлектәре сикләнгән балалар фестивале бара

Бөгөн баш ҡаланың 28-се махсус (коррекцион) дөйөм белем биреү мәктәбе-интернатында мөмкинлектәре сикләнгән балалар слеты башланды. Ул ике йылға бер тапҡыр үткәрелә, быйыл иһә туғыҙынсы тапҡыр үткәреләсәк. Йәштәрҙең башланғыстарын яҡлау һәм үҫтереү йылына арналған сараның ойоштороусыһы - БР Мәғариф министрлығы. Ярыштарҙа ҡатнашыу өсөн республиканың 37 махсус учреждениеһынан 200-гә яҡын бала йыйылған. Ҡатнашыусыларҙы төрлө спорт төрҙәре буйынса бәйгеләр көтә. Балалар шиғыр уҡыу, йыр башҡарыу, бейеү, музыка ҡоралдарында уйнау кеүек ижади конкурстарҙа ла үҙҙәрен һынап ҡарай ала.

— Беҙҙең ҡарашҡа һеҙҙең бөтәгеҙ ҙә еңеүселәр,— тине БР Мәғариф министры вазифаһын башҡарыусы Владимир Аристархов.

— Сөнки һеҙ үҙегеҙҙең ныҡышмалы һәм көслө булыуығыҙ, тормошҡа оптимистик кәйеф менән ҡарауығыҙ арҡаһында бөгөнгө фестивалдә ҡатнашаһығыҙ.

Фестивалде тантаналы асыу сиктәрендә Владимир Аристархов “ Рәсәй буяҙары” күргәҙмәһе призерҙары һәм еңеүселәренә дипломдар тапшырҙы.

— Сараның төп маҡсаты – йәмәғәтселек иғтибарын мөмкинлектәре сикләнгән балаларҙың проблемаларына йүнәлтеү, — тине БР Мәғариф министрлығының баш белгес-эксперты Любовь Еремеева. — Балаларҙың бөтә яҡлап ни тиклем һәләтле булыуҙарын барыһына ла күрһәткебеҙ килә беҙҙең. Ижад һәм спорт менән шөғөлләнеү уларға башҡа кешеләр менән аралашырға ярҙам итә бит.Уның менән махсус мәктәптәрҙә тәрбиәләнеүселәрҙең ата-әсәләрелә килешә.

— Беҙҙең балалар оло тормошҡа ҙур ҡыйынлыҡтар менән баҫа. — ти улар. — Рух ныҡлығына, ҡыйыулыҡҡа, батырлыҡҡа көн һайын имтихан үтә улар. Шуға күрә беҙҙең өсөн ошо тормошта уларҙың юғалып ҡалмай, үҙ урындарын табыуы бик мөһим.