Республикаға диспансерлаштырыу планын арттырҙылар

“Һаулыҡ” милли проекты сиктәрендә Башҡортостанда “Өҫтәмә диспансерлаштырыу” йүнәлеше буйынса эштең уңышлы үткәрелеүе һөҙөмтәһендә РФ Һаулыҡ һаҡлау һәм социаль үҫеш министрлығы диспансерлаштырыу планын 40 мең кешегә тиклем арттырыу тураһында ҡарар ҡабул итте. Хәҙер Башҡортостан Республикаһы федераль бюджеттан өҫтәмә рәүештә 46,7 миллион һум аҡса аласаҡ. Был турала БР Һаулыҡ һаҡлау министрлығының матбуғат хеҙмәтенән хәбәр иттеләр.

2008-2009 йылдарҙа Рәсәй Федерацияһының мотлаҡ медицина страховкалауы системаһында страховкаланған бөтә эшләүсе граждандары өҫтәмә диспансерлаштырыу үтә.

Диспансерлаштырыу терапевт, акушер-гинеколог, невролог, уролог (ирҙәр өсөн), хирург, офтальмолог, эндокринолог тарафынан үткәрелә. Диспансерлаштырыу сиктәрендә холестерин, ҡандағы шәкәр кимәле тикшерелә, электрокардиография, флюорография, 40 йәштән өлкән ҡатындарға маммография үткәрелә.