Ғилми-ғәмәли конференция үткәрелә

Рәсәй Эске эштәр министрлығының Өфө юридик институтында "ХХI быуатта актуаль хоҡуҡ һәм дәүләт проблемалары" халыҡ-ара ғилми-ғәмәли конференцияһы үтә. Ғилми форумда Мәскәүҙәге БМО Мәғлүмәт үҙәге вәкиле, Рәсәйҙең күп төбәктәренән, шулай уҡ яҡын сит илдәрҙән - Украина, Ҡаҙағстан һәм Үзбәкстандан билдәле ғалимдар, дәүләт власы органдары вәкилдәре, Башҡортостандың юғары уҡыу йорттары уҡытыусылары, хоҡуҡ һаҡлау органдары хеҙмәткәрҙәре ҡатнаша.

- Беҙҙең конференция хоҡуҡ һәм дәүләттең хәҙерге замандағы үҫеш проблемаларына, дәүләт власы органдары һәм хоҡуҡ һаҡлау органдарының енәйәтселеккә ҡаршы көрәштә үҙ-ара эш итеү, хоҡуҡ һаҡлау эшмәкәрлеген камиллаштырыу мәсьәләләренә, дөйөм алғанда, глобалләштереү һәм донъя иҡтисади көрсөгөн йырып сығыу проблемаларына арналa, - тине "Башинформ" агентлығына Рәсәй Эске эштәр министрлығының Өфө юридик институты начальнигының ғилми эш буйынса урынбаҫары, милиция полковнигы, юридик фәндәр докторы Ришат Ниғмәтуллин.

Институт ғилми-ғәмәли конференцияларҙы ун йылға яҡын инде йыл һайын үткәрә. 2007 йылда бындай фәнни форум - ойошҡан енәйәтселеккә ҡаршы көрәштең халыҡ-ара һәм милли проблемаларына, 2008 йылда наркотиктарҙың законһыҙ әйләнешенә ҡаршы көрәш проблемаларына арналды. Конференция йомғаҡтары буйынса материалдар йыйынтыҡтары сығарыла, улар ғилми тикшеренеүҙәрҙә һәм уҡыу процесында бик тә талап ителә.