Ташҡын осоронда һыу сифаты айырыуса иғтибар талап итә

Роспотребнадзорҙың БР буйынса идаралығы һәм уның территориаль бүлектәре ташҡынға әҙерлек башынан алып республиканың эпидемиологик мөһим һәм химик бысраныу яғынан потенциаль хәүефле 141 объектында тикшереү үткәрҙе. Был турала республика ташҡынға ҡаршы комиссия ултырышында идаралыҡ етәксеһе урынбаҫары Нина Кондрова хәбәр итте. Уның әйтеүенсә, республика һыулыҡтарының күбеһен таҙартыу һәм зарарһыҙландырыу хәле кәрәкле таҙартыу ҡоролмалары комплексы булмау арҡаһында ҡәнәғәтләнерлек түгел. Мәҫәлән, ҡайһы бер райондарҙа асыҡ һыулыҡтарға таҙартылмаған йәки өлөшләтә генә таҙартылған хужалыҡ-көнкүреш һыуҙары ағып төшә. Шулай уҡ предприятиеларҙан ағып төшкән микробиологик һәм санитар-химик күрһәткестәр буйынса гигиена нормативтарына тап килмәгән бысраҡ һыуҙарҙы таҙартыу технологияһын боҙоу осраҡтары билдәләнә. - Стәрлетамаҡ станоктар эшләү заводынан ағып төшкән һыуҙа нефть продукттары миҡдары норманан ике тапҡырға артығыраҡ, ә "Сода" асыҡ акционерҙар йәмғиәте ташлама һыуҙарында - биш тапҡырға, - тине Нина Кондрова. - Ҡайһы бер райондарҙа производство һәм ҡулланыу ҡалдыҡтарын өйгәндә санитария ҡағиҙәләре күҙәтелмәй, шулай уҡ йылға-күлдәрҙең санитар-һаҡ зоналарына ҡалдыҡтарҙы рөхсәтһеҙ сығарып ташлау күренештәре асыҡланды. Тикшереү һөҙөмтәләре буйынса идаралыҡ инспекторҙары бөтәһе 211 мең һумға 95 штраф һалды. Ҡағиҙә боҙоусыларҙың барыһына ла санитария закондары талаптарын боҙоуҙарҙы бөтөрөү тураһында тейешле күрһәтмәләр бирелде.