Виктор Пегов алтын миҙал менән наградланды

БР-ҙың атҡаҙанған мәҙәниәт хеҙмәткәре, Өфө балалар сәнғәт мәктәбе уҡытыусыһы Виктор Пегов Рәсәй Ижади Рәссамдар Союзының һәм Халыҡ-ара Рәссамдар федерацияһының алтын мизалы менән наградланды. 45 йылдан ашыу ул Орджоникидзе исемендәге Мәҙәниәт һарайы эргәһендә урынлашҡан Өфө балалар сәнғәт мәктәбендә һынлы сәнғәттән уҡыта. Быйыл февраль айында Михаил Нестеров исемендәге Республика Дәүләт Художество музейында Пеговтың 70 йәшенә арналған "Тарих. Ер. Кешеләр" тигән персональ күргәҙмәһе үткәрелде. Рәссам Виктор Пегов үҙ картиналарында иң төп идеяны - тормошҡа һөйөүҙе сағылдыра алған. Уның "Ҡояшлы көн", "Тал бөрөләнә", "Ихата" картиналарынан эскерһеҙлек, изге йылылыҡ бөркөлә. Педагог Пегов үҙенең бөтә уҡытыусылыҡ эшмәкәрлеге барышында уҡыусыларында иң мөһим нәмә - тормошҡа изгелек һәм һөйөү менән ҡарау оҫталығы тәрбиәләргә тырыша. Хәҙер "Тарих. Ер. Кешеләр" күргәҙмәһе Өфө балалар сәнғәт мәктәбе фойеһында эшләй.