Радий Хәбиров Башҡортостан парламенты эшенә баһа бирҙе

Башҡортостан Башлығы Радий Хәбиров бөгөн республика Дәүләт Йыйылышының 28-се пленар ултырышында депутаттарға конструктив һәм яйға һалынған эш өсөн рәхмәт белдерҙе.

«Һеҙ сығарған закондар базаһы бөгөн республиканың бөтә йүнәлештәр буйынса алға барыуына йоғонто яһай. Башҡортостандың депутаттар корпусы республика ҡануниәтсеһе генә түгел, федераль хоҡуҡи көн тәртибен формалаштырыуҙа ҡатнашыусы булараҡ үҙенең статусын нығыта. Быйыл беҙҙең 17 закон сығарыу башланғысы Закон сығарыусылар советына ебәрелде. 15 федераль закон проекты – Дәүләт Думаһына. 2025 йылдың ике сессияһында Дәүләт Йыйылышы 222 закон проектын ҡараны, уларҙың 151-е закон статусын алды», – тип билдәләне Радий Хәбиров.

Башҡортостан Башлығы фекеренсә, бөгөн төп өҫтөнлөк – махсус хәрби операция бурыстарын хәл итеү.

«МХО-ла ҡатнашыусыларға һәм уларҙың ғаилә ағзаларына 54 ярҙам сараһын тормошҡа ашырыу өсөн былтыр республика ҡаҙнаһынан 13,4 миллиард һум йүнәлтелгән. Быйыл бүленгән аҡса күләмен ике тапҡырға – 25,5 миллиард һумға тиклем арттырҙыҡ. Быйыл МХО-ла ҡатнашыусыларға һәм уларҙың ғаиләләренә ярҙам күрһәтеүгә йүнәлтелгән 4 закон ҡабул ителде. Өс закон сығарыу башланғысы федераль үҙәккә ебәрелде. Республика закондарының тағы 4 проекты закон сығарыу стадияһында», – тип билдәләне Радий Хәбиров.

Быйыл Дәүләт Йыйылышы үҙенең 30 йыллығын билдәләне, тип иҫкә төшөрҙө республика етәксеһе. Был юбилей – республика тарихында мөһим этап, Башҡортостандың төп закондар сығарыу органы эшенең абруйын һәм сифатын раҫлау.

«Республика һәр ваҡыт, хатта иң ҡатмарлы осорҙа ла, парламенттың һәм башҡарма власть органдарының берлектә килешеп эшләү, закон сығарыусыларҙың урындағы совет депутаттары, йәмәғәт ойошмалары һәм граждандар менән туранан-тура диалогы миҫалын күрһәтте. 10 айҙан һуң, 2026 йылдың сентябрендә, 9-сы саҡырылыш Дәүләт Думаһы депутаттарын, шулай уҡ 6-сы саҡырылыш Өфө ҡала Советы депутаттарын һайлау була. Ошо мөһим сәйәси ваҡиғаларға әҙерлек ҡатмарлы шарттарҙа алып барыла. Республика Хөкүмәте менән берлектә яйға һалынған эш, беҙҙең пландарға һәм башланғыстарға закондар менән ярҙам өсөн тағы бер тапҡыр рәхмәт белдерәм. Алдыбыҙҙа торған яуаплы бурыстарҙы уңышлы хәл итербеҙ тип ышанам. Еңеүҙе яҡынайтыу өсөн барыһын да эшләрбеҙ. Һеҙгә республика һәм уның халҡы мәнфәғәтенә закон сығарыу эшмәкәрлегендә уңыштар теләйем», – тип йомғаҡ яһаны Радий Хәбиров.

https://www.bashinform.ru/news/politics/2025-12-18/radiy-habirov-dal-otsenku-rabote-parlamenta-bashkirii-4512188