Башҡортостан парламенты Дәүләт Думаһына эттәрҙе хәүеф сығанағына индерергә тәҡдим итте

Дәүләт Йыйылышы депутаттары Дәүләт Думаһына уҫал эттәрҙе юғары хәүеф сығанағына индерергә тәҡдим иткән закон проектын индерҙе. Рәсәй Федерацияһы Граждандар кодексының икенсе өлөшөнөң 1079-сы статьяһына үҙгәрештәр тәҡдим ителә. Бынан алдараҡ Рәсәйҙең Закон сығарыусылар советында әлеге башланғысты хупланылар.

Республика парламентының матбуғат хеҙмәтендә белдереүҙәренсә, документ юғары хәүеф сығанаҡтары исемлеген киңәйтә. Был, тәү сиратта, хайуандарҙың кешеләргә һөжүм итеүе тураһында эштәр буйынса гражданлыҡ-хоҡуҡи бәхәстәрҙе хәл итеү өсөн мөһим. Хәҙер судтар бындай хоҡуҡ боҙоуҙарға төрлөсә баһа бирә ала, шуға күрә матди һәм әхлаҡи зыянды ҡаплау тураһында суд ҡарарҙары ла төрлөсә булырға мөмкин.

Әгәр закон ҡабул ителһә, төрлө ҡараштар булмай. Эт хужаһы юғары хәүеф сығанағы хужаһы булараҡ яуап бирергә тейеш. Зыян күреүсегә хайуандың һөжүм итеүен иҫбатлау ҙа етә. Тимәк, зыянды ҡаплау еңелерәк була. Был иһә эт хужаларын йорт хайуандарына, уларҙы өйрәтеүгә һәм йөрөтөүгә яуаплыраҡ ҡарарға мәжбүр итер тип көтөлә.

https://www.bashinform.ru/news/politics/2025-11-27/parlament-bashkirii-predlozhil-gosdume-otnesti-sobak-k-istochniku-opasnosti-4483746