Мәскәүҙә Өфөлә еңел атлетика манежын төҙөү мөмкинлектәрен тикшерҙеләр

«Рәсәй Федерацияһының Спорт министрлығы – беҙҙең иң мөһим партнерҙарҙың береһе. Шуға күрә уның етәксеһе Михаил Дегтярев менән республикала физкультураны һәм спортты үҫтереү мәсьәләләрен тикшереү өсөн даими осрашып торорға һөйләштек. Ошондай даими уртаҡ эш кенә һөҙөмтә бирә», — тип яҙҙы республика Башлығы.

Радий Хәбиров Михаил Владимировичҡа республикабыҙға даими һәм әүҙем ярҙамы өсөн рәхмәт белдерҙе. Министрлыҡ яғынан иғтибарҙың булыуы һөҙөмтәһендә, ҡатмарлы осорға ҡарамаҫтан, Башҡортостанда спорт инфраструктураһы объекттарын төҙөү эштәре йылдам бара.

Һөйләшеү темаларының береһе Өфөлә еңел атлетика манежын төҙөү перспективаларына арналды.

«Был объект республикабыҙға бик кәрәк. Еңел атлетика – популяр спорт төрө, ә республикала ябыҡ еңел атлетика манежы бер ҡасан да булманы», — тип билдәләне Радий Хәбиров.

Осрашыуҙа Башҡортостанда халыҡ-ара һәм федераль саралар ойоштороу хаҡында ла һүҙ барҙы. Атап әйткәндә, быйыл декабрҙә республикала һаулыҡ мөмкинлектәре сикләнгән балалар араһында тәүге БДБ уйындары үткәрелә, 2026 һәм 2028 йылдарҙа иһә Башҡортостан Рәсәйҙең төп спорт ярыштарын – Йәйге һәм ҡышҡы спорт төрҙәре буйынса иң көслөләр спартакиадаһын ҡабул итергә әҙерләнә.

https://www.bashinform.ru/news/politics/2025-09-09/v-ufe-obsudili-perspektivy-stroitelstva-legkoatleticheskogo-manezha-4381373