Башҡортостан Башлығы террорҙан һаҡланыу сараларын көсәйтергә ҡушты

Башҡортостан Башлығы Радий Хәбиров республика террорға ҡаршы комиссияһының һәм оператив штабтың берлектәге ултырышын үткәрҙе. Унда профилле министрлыҡтар һәм ведомстволар, оператив хеҙмәттәр һәм көс структуралары етәкселәре, шулай уҡ предприятиелар вәкилдәре ҡатнашты.

Ултырышта инфраструктура һәм сәнәғәт объекттарын террор хәүефенән һаҡлау мәсьәләһе тикшерелде. Радий Хәбиров төбәктә объекттарҙы теракттарҙан, шул иҫәптән пилотһыҙ аппараттарҙан һаҡлау буйынса тейешле саралар күрелеүен билдәләне. Ул әлеге хәлде иҫәпкә алып, өҫтәмә саралар әҙерләргә ҡушты.

Шулай уҡ ултырышта йәштәр араһында терроризм идеологияһын һәм неонацизм идеяларын таратыуға юл ҡуймау тураһында һүҙ барҙы. Ошо эш өсөн яуаплы белгестәрҙең һөнәри әҙерлек кимәлен күтәреү мөһим, тип билдәләне республика  етәксеһе.

Мәғариф һәм йәштәр министрҙары һүҙҙәренсә, уҡытыусылар һәм йәштәр ойошмалары активистары өсөн белем биреү программалары әҙерләнгән. Бынан тыш, Башҡортостанда мәктәп уҡыусылары һәм студенттар араһында, шул иҫәптән федераль эксперттар ҡатнашлығында иҫкәртеү саралары даими үткәрелә.

https://www.bashinform.ru/news/politics/2025-06-11/glava-bashkirii-poruchil-usilit-mery-antiterroristicheskoy-zaschity-4274081