Рәсәйҙә балалар өсөн ял лагерҙарында тәрбиә эше камиллаштырыла

Рәсәйҙә балалар өсөн ял лагерҙарында тәрбиә эше камиллаштырыла. Дәүләт Думаһы депутаттары икенсе һәм өсөнсө уҡыуҙа тейешле закон ҡабул итте. Дәүләт Думаһы рәйесе Вячеслав Володин һүҙҙәренсә, балаларҙың ял лагерҙарында тәрбиәүи эштең берҙәм программаһы булдырыла. Программаны һәм уның календарь планын федераль башҡарма власть органы раҫлай. Вожатыйҙар һәм тәрбиәселәр үҙ эшен ошо документтар буйынса төҙөргә бурыслы.

«Календарь планға мотлаҡ ата-әсә көндәре, балаларҙы сәнғәт һәм нәфис әҙәбиәт әҫәрҙәре менән таныштырыу, фильмдар күрһәтеү, шулай уҡ уйындар һәм ватансылыҡ тойғоһо, эш һөйөүсәнлек, үҙ-ара хөрмәт, мәҙәни мираҫҡа, тәбиғәткә һәм тирә-яҡ мөхиткә һаҡсыл мөнәсәбәт формалаштырыуға йүнәлтелгән башҡа саралар индерелә», — тине Дәүләт Думаһы рәйесе.

Билдәләнеүенсә, депутаттар 2025-2027 йылдар бюджетына төҙәтмәләр әҙерләгән һәм ҡабул иткән, уларға ярашлы 2025, 2026 һәм 2027 йылдарҙа балаларҙың ялы һәм уларҙы һауыҡтырыу өсөн заманса инфраструктура булдырыуға бюджет ассигнованиелары йыл да 1 миллиард һумға арттырыла.

https://www.bashinform.ru/news/politics/2024-12-18/v-rossii-usovershenstvuyut-vospitatelnuyu-rabotu-detskih-lageryah-otdyha-4057309