Башҡортостан Дәүләт Йыйылышы 30 йыллыҡ юбилейын билдәләй

Өфөлә Башҡортостан Дәүләт Йыйылышының 30 йыллыҡ юбилейына әҙерлек буйынса ойоштороу комитетының ултырышы уҙҙы. Ул 2025 йылда билдәләнә. Сарала власть органдары, ғилми һәм белем биреү ойошмалары вәкилдәре, депутаттар ҡатнашты. Был хаҡта республика парламентының матбуғат хеҙмәте хәбәр итә.

Саралар планына ярашлы, юбилей алдынан мәктәптәрҙә һәм юғары уҡыу йорттарында парламентаризм дәрестәре, лекциялар үткәрелә, китаптар һәм архив документтары күргәҙмәләре ойошторола. Журналистар араһында парламент тематикаһын иң яҡшы яҡтыртыуға конкурс иғлан ителде. Дәүләт Йыйылышы – Ҡоролтайҙа асыҡ ишектәр көнө уҙғарыла. Парламенттың 30 йыллығына арналған документаль фильм һәм китап әҙерләнә. Киләһе йылдың мартында тантаналы йыйылыш һәм ғилми-ғәмәли конференция була. Парламентаризм ветерандарын һәм ҡануниәт үҫешенә тос өлөш индергән кешеләрҙе ҡотлау планлаштырыла.

Башҡортостан Дәүләт Йыйылышы рәйесе Константин Толкачев һүҙҙәренсә, юбилей айҡанлы тантаналар, концерттар, салюттар булмай. Сараларҙың төп маҡсаты – парламенттың республика тарихындағы ролен һәм әһәмиәтен, уның граждандарҙың көндәлек тормошона йоғонтоһон билдәләү.

https://www.bashinform.ru/news/politics/2024-11-14/gossobranie-bashkirii-otmetit-30-letniy-yubiley-4007594