Өфөлә Радий Хәбиров Стратегик башланғыстар агентлығы етәксеһен Аксаков баҡсаһына алып барҙы

3 июлдә Өфөлә Башҡортостан Башлығы Стратегик башланғыстар агентлығының генераль директоры Светлана Чупшева өсөнАксаков исемендәге баҡса буйлап экскурсия үткәрҙе. Ул республикабыҙға бизнес берләшмәһе менән осрашыу һәм Global Management Challenge чемпионатының милли финалында ҡатнашыу өсөн килде.

Республика етәксеһе баҡсаны төҙөкләндереү эшенең 2023 йылдың апрелендә башланыуы һәм «Торлаҡ һәм ҡала мөхите» милли проектының «Уңайлы ҡала мөхитен булдырыу» федераль проекты сиктәрендә алып барылыуы хаҡында һөйләне. Аксаков исемендәге баҡса мәҙәни мираҫ ҡомартҡыларына ҡарай. Шуға күрә архитекторҙар ошо биләмәнең тарихи зоналарын һәм объекттарын һаҡлап ҡалдырған.

Радий Хәбиров Светлана Чупшева менән тарихи аллея буйлап үтте, йәйге амфитеатрҙы, ваҡиғалар майҙансығын, балалар өсөн уйын комплексын ҡараны.

Йәмәғәт киңлеген төҙөкләндергәндә инженер коммуникациялары реконструкцияланды, юлдар һалынды, бәләкәй архитектура формаларын урынлаштырылды, биләмә йәшелләндерелде, тине республика етәксеһе. Шул уҡ ваҡытта ҡиммәтле ағастарҙы, шул иҫәптән 1834 йылдан бирле үҫкән боронғо ҡарағасты һаҡлап алып ҡалғандар. Яңыртылған баҡсала плитка менән һалынған Аксаковтар нәҫеленең шәжәрә ағасы ла бар.

«Беҙ төрлө йәштәге кешеләргә ял итеү өсөн шарттар булдырырға тырыштыҡ. Өфөләр әйтеүенсә, мөхәббәт һәм ғаилә йылыһы баҡсаһы барлыҡҡа килде», — тип билдәләне Радий Хәбиров.

Светлана Чупшева йәмәғәт киңлеген төҙөкләндереү буйынса башҡарылған эштәрҙе ыңғай баһаланы. Бында барыһы лп Сергей Тимофеевич Аксаковтың ижадына һөйөү менән башҡарылған, тип билдәләне ул.

https://www.bashinform.ru/news/politics/2024-07-03/v-ufe-radiy-habirov-pokazal-glave-asi-aksakovskiy-sad-3834223