Өфөнөң Совет районы хакимиәте башлығы Рөстәм Рәхмәтуллин вазифаһын ҡалдыра

Өфөнөң Совет районы хакимиәте башлығы Рөстәм Рәхмәтуллин вазифаһын бушата. Мэр Ратмир Мәүлиев баш ҡала хакимиәтендәге оператив кәңәшмәлә кадрҙар алмашыныуы тураһында хәбәр итте.

«Мин уға ҡаланың ҙур предприятиеларының береһен етәкләүен һорап мөрәжәғәт иттем, унда бөгөн уның көс-дәрте, коммуналь өлкәләге тәжрибәһе кәрәк. Рөстәм Наил улы ризалашты. Һис шикһеҙ, һеҙгә ҙур өмөттәр бағлайбыҙ. Район өсөн бик күп эштәр башҡарғанығыҙ өсөн рәхмәт. Артабан да бергәләп эшләрбеҙ», – тине Өфө хакимиәте башлығы.

Ратмир Мәүлиев күп йыллыҡ хеҙмәте һәм районға уңышлы етәкселек иткәне өсөн Рәхмәтуллинға рәхмәт хаты тапшырҙы.

«Етәксеңдән награда алыу – бик күңелле. Өлфәт Мансур улы ла, Сергей Николаевич та бүләкләргә өлгөрмәне. Һеҙҙең ҡулдан алдым, ҙур рәхмәт, –Рөстәм Рәхмәтуллин. – Был беҙҙең ябай хеҙмәтебеҙгә оло баһа булып тора. Минең һәм Совет районы хакимиәте коллективының. Һис шикһеҙ, биш йыл район етәксеһе булып эшләгән осорҙа байтаҡ эштәр атҡарылған».

Хәтерегеҙгә төшөрәбеҙ, Рөстәм Рәхмәтуллин Совет районы башлығы итеп 2019 йылда тәғәйенләнгәйне.

https://www.bashinform.ru/news/politics/2023-10-17/glava-administratsii-sovetskogo-rayona-ufy-rustem-rahmatullin-pokidaet-svoy-post-3481478