Башҡортостан Дәүләт Йыйылышының яңы һайланған депутаттары ҡасан эшләй башлай?

Башҡортостан Дәүләт Йыйылышы - Ҡоролтай рәйесе Константин Толкачев етенсе саҡырылыш депутаттарының эше ҡасан башланасағы хаҡында һөйләне.

«Хәҙер беҙ тауыш биреүҙең һуңғы һөҙөмтәләрен көтәбеҙ — яҡын арала мәғлүмәттәр халыҡҡа иғлан ителергә тейеш. Закон буйынса яңы саҡырылыш парламенты беренсе пленар ултырышта үҙ хоҡуғына эйә була. Ул быйыл октябрь башында үтергә тейеш. Ултырышта Дәүләт Йыйылышының структураһы булдырыла, рәйес һәм уның урынбаҫарҙары һайлана, даими комитеттарҙың составы билдәләнә. Беренсе ултырышҡа әҙерлек менән ойоштороу комитеты шөғөлләнә. Ул барлыҡ фракцияларҙың вәкилдәренән депутат мандаттары һанын иҫәпкә алып төҙөлә. Ойоштороу комитеты тәҡдимдәр әҙерләй, улар депутаттарҙың тауыш биреүенә сығарыла», - тине Константин Толкачев.

Уның һүҙҙәренсә, парламенттың даими комитеттары структураһында үҙгәрештәр булыуы ихтимал. Улар комитеттарҙың һанына, шулай уҡ уларҙың эшмәкәрлек йүнәлештәренә лә ҡағылыуы мөмкин. Был ағымдағы көн тәртибенең үҙенсәлектәренә бәйле.

Республика парламентының яңы составы тураһында тулыраҡ «Башинформ» мәғлүмәт агентлығы материалында уҡығыҙ.

https://www.bashinform.ru/news/politics/2023-09-13/stalo-izvestno-kogda-nachnut-rabotu-izbrannye-deputaty-gossobraniya-bashkirii-3433595