Башҡортостан етәксеһе статистиктарға халыҡ иҫәбен алыуҙы яҡшы ойошторғандары өсөн рәхмәт белдерҙе

Башҡортостан Башлығы Радий Хәбиров республика статистиктарына халыҡ иҫәбен алыуҙы юғары кимәлдә үткәргәндәре өсөн рәхмәт белдерҙе һәм уларҙы һөнәри байрамы менән ҡотланы.

«Башстат коллективына мөһим эш өсөн рәхмәт әйткем килә. Бөтә Рәсәй халыҡ иҫәбен алыуҙа тиҫтә мең кеше ҡатнашты. Халыҡ иҫәбен алыу мәғлүмәттәренә таянып, республиканы үҫтереү буйынса дөрөҫ ҡарар ҡабул итеү өсөн был бик мөһим», —  тине Радий Хәбиров республика хөкүмәтенең оператив кәңәшмәһендә.

Бынан һуң Башстаттың өс хеҙмәткәрен бүләкләү тантанаһы уҙҙы. Республика Башлығы Указы менән халыҡ һәм һаулыҡ һаҡлау статистикаһы бүлеге етәксеһе Ирина Үтәшева Салауат Юлаев ордены менән бүләкләнде. «Хеҙмәт батырлығы өсөн» миҙалына мәғлүмәт ресурстары һәм технологиялары бүлеге начальнигы урынбаҫары Рәмзилә Исхаҡова лайыҡ булды. Финанс-иҡтисад бүлеге начальнигы Ирина Дауытоваға «Башҡортостан Республикаһының  атҡаҙанған иҡтисадсыһы» тигән маҡтаулы исем бирелде.

Хәтерегеҙгә төшөрәбеҙ, 25 июндә Рәсәйҙә Статистика хеҙмәткәрҙәре көнө билдәләнә. Ил өсөн мөһим ҡарарҙар ҡабул итеү өсөн сифатлы, дөрөҫ статистика мәғлүмәттәрен алыу башлыса үҙҙәрен статистик иҫәп өлкәһенә арнаған хеҙмәткәрҙәрҙең юғары һөнәри оҫталығына бәйле.

Өфөлә Статистика комитеты 1835 йылдың 9 мартында (хәҙерге стиль буйынса 21 мартта) асылған.

https://www.bashinform.ru/news/politics/2022-06-20/glava-bashkirii-poblagodaril-statistikov-za-horoshuyu-organizatsiyu-perepisi-naseleniya-2847668