Радий Хәбиров Башҡортостан журналистарын һөнәри байрамы менән ҡотланы

Башҡортостан Башлығы Радий Хәбиров журналистарҙы республиканың матбуғат һәм мәғлүмәт хеҙмәткәрҙәре көнө менән ҡотланы.

Радий Хәбиров билдәләүенсә, заманса медиатармаҡ республика тормошон төрлө яҡлап яҡтырта, яңылыҡтар менән таныштыра, халыҡҡа «төп ваҡиғалар үҙәгендә» булырға ярҙам итә.

«Бөгөн яңы медиатехнологиялар йылдам үҫешә, мәғлүмәт киңлеге киңәйә. Журналист һүҙе йәмғиәттә әһәмиәтле һәм абруйлы булып ҡала. Һеҙ еткергән мәғлүмәттән халыҡты борсоған проблемалар тураһында беләбеҙ, уларҙы һөҙөмтәле һәм тиҙ арала хәл итергә тырышабыҙ», — тип белдерҙе ул.

Бөгөнгө көндә Башҡортостандың киң мәғлүмәт сараларында өс меңгә яҡын журналист эшләй.

Республика етәксеһе фекеренсә, яңы ысынбарлыҡта, бер яҡтан, «киң мәғлүмәт сараларының тел һәм мәҙәни оҡшашлығын һаҡларға», икенсенән, яңы үҫеш нөктәләрен эҙләргә, «мультимедиалы һәм һанлы ҡоралдар ярҙамында ҡыҙыҡлы контент булдырырға» кәрәк.

Башҡортостан Башлығы Радий Хәбиров күп йылдар дауамында матбуғат һәм журналистика өлкәһендә емешле эшләгән, традицияларҙы һаҡлап ҡалған, үҙҙәренең тәжрибәһе менән уртаҡлашҡан ветерандарға рәхмәт белдерҙе.

«Һеҙгә бөтмәҫ-төкәнмәҫ ижади дәрт, яңы идеялар һәм уй-фекерҙәр теләйем. Журналист һүҙе һәр саҡ дөрөҫлөктө алып барһын, тыуған республикабыҙ һәм илебеҙ мәнфәғәтенә хеҙмәт итһен», — тип йомғаҡ яһаны Радий Хәбиров.

https://www.bashinform.ru/news/politics/2022-06-14/radiy-habirov-pozdravil-zhurnalistov-bashkirii-s-ih-professionalnym-prazdnikom-2839021