Нефтекама депутаттары сираттағы ултырышта ҡала мэры Ратмир Мәүлиевтың отставкаһын ҡабул итте

Бөгөн Нефтекамала бишенсе саҡырылыш ҡала Советының 20-се ултырышы үтте, унда депутаттар ҡала хакимиәте башлығы Ратмир Мәүлиевтың отставкаһын ҡабул итте. Хәтерегеҙгә төшөрәбеҙ, ошо вазифала ул 2019 йылдың мартынан бирле эшләне.

Нефтекама ҡала Советы рәйесе Радус Әхмәтшин 11 февралдә Советҡа Ратмир Мәүлиевтан вәкәләттәрен ваҡытынан алда туҡтатыу тураһында ғариза килде тип билдәләне. Депутаттар был ҡарарҙы хупланы.

«Беҙ һеҙҙең менән өс йыл иңгә-иң терәшеп эшләнек, социаль һәм мәҙәни объекттар төҙөү буйынса ҙур эш башҡарҙыҡ, халыҡ янында булдыҡ. Башҡортостан Башлығы миңә икенсе вазифаға күсергә тәҡдим итте, мин, уның командаһы ағзаһы булғас, был тәҡдимде ҡабул иттем. Нефтекама – тыуып үҫкән ҡалам. Берлектәге эше өсөн ҙур рәхмәт, эш артабан да дауам итер, алда уртаҡ пландарыбыҙ күп. Һәр берегеҙгә ихлас рәхмәтлемен», – тине Ратмир Мәүлиев.

Депутаттар ҡарары менән Нефтекама хакимиәте башлығы вазифаһын башҡарыу беренсе урынбаҫар Эльдар Вәлитовҡа йөкмәтелде.

https://www.bashinform.ru/news/politics/2022-02-14/deputaty-neftekamska-na-ocherednom-zasedanii-prinyali-otstavku-mera-goroda-ratmira-mavliev-2691820