Башҡортостан һәм Өфө яңылыҡтары
76.69
+0.25
86.91
+0.08
87.62
-0.6
-10 °C
Ҡар
Бөтә яңылыҡтар
Сәйәсәт
15 Декабрь 2021, 14:52

Радий Хәбиров Башҡортостандың яңы прокурорын вазифаға тәғәйенләнеүе менән ҡотланы

Башҡортостан Башлығын Игорь Пантюшин менән Рәсәйҙең генераль прокуроры урынбаҫары Николай Шишкин таныштырҙы.

Фото:glavarb.ru

Осрашыу 15 декабрҙә Республика йортонда үтте. Игорь Пантюшин Рәсәй Президентының 2021 йылдың 8 декабрендәге указы менән Башҡортостан Республикаһы прокуроры итеп тәғәйенләнде.

«Һеҙҙе яңы вазифала эш башлауығыҙ менән ҡотларға рөхсәт итегеҙ. Республика прокуратураһына етәкселек итеү – ҙур яуаплылыҡ. Башҡортостан – Рәсәйҙең мөһим төбәге. Бында 4 миллиондан ашыу кеше йәшәй. Беҙҙең иҡтисад ныҡлы, әүҙем үҫешәбеҙ, – тине Радий Хәбиров. – Башҡортостан – күп милләтле республика. Бында 150-нән ашыу милләт вәкиле дуҫ һәм татыу йәшәй. Республика прокуратураһына килгәндә, был бик һөҙөмтәле орган. Эшебеҙ ҙә уртаҡ, сөнки халыҡтың мәнфәғәтен яҡлау – иң мөһиме».

«Игорь Станиславович – тәжрибәле, белемле, һөнәри әҙерлекле прокуратура етәксеһе, – тине Николай Шишкин. – Мин уны күп йылдар беләм, ул намыҫлы кеше тип ышаныслы әйтә алам. Һеҙгә Башҡортостанда уңыштар теләйем!».

Игорь Пантюшин 1966 йылдың 22 ноябрендә Тамбов өлкәһендә тыуған. Воронеж дәүләт университетын тамамлаған. Юридик фәндәр кандидаты.

1991-2000 йылдарҙа Липецк өлкәһе Грязинск район-ара прокуроры тәфтишсеһе, ярҙамсыһы, өлкән ярҙамсыһы, урынбаҫары булып эшләй. 2000 йылда Липецк өлкәһе Задонск районы прокуроры вазифаһына тәғәйенләнә. 2001 йылдан – Липецк өлкәһе прокуроры урынбаҫары.

2003–2013 йылдарҙа – Липецк өлкәһе прокуроры.

2013–2021 йылдарҙа  – Владимир өлкәһе прокуроры.

II дәрәжә «Ватан алдындағы хеҙмәттәре өсөн» орденының миҙалы, «Рәсәй Федерацияһы прокуратураһының почетлы хеҙмәткәре» билдәһе менән бүләкләнгән.

Рәсәй Федерацияһының атҡаҙанған прокуратура хеҙмәткәре, 2 класлы дәүләт юстиция советнигы.

Фото:glavarb.ru