Башҡортостан һәм Өфө яңылыҡтары
74.06
+0.09
83.81
-0.02
71.95
+2.28
0 °C
Болотло
Бөтә яңылыҡтар
Сәйәсәт
17 Ноябрь , 10:26

Башҡортостан властары һәм Рәсәй тимер юлдары тимер юл инфраструктураһын ғәмәлгә ашырыу пландарын тикшерҙе

Фото:Олег Яровиков

Мәскәүҙә XV «Рәсәй транспорты» Халыҡ-ара форумы барышында Башҡортостан Башлығы Радий Хәбировтың һәм «Рәсәй тимер юлдары» йәмғиәте идараһы рәйесе – генераль директоры Олег Белозёровтың эшлекле осрашыуы булды.

Яҡтар республиканың тимер юл инфраструктураһын яңыртыу мәсьәләләрен тикшерҙе. Улар иҫәбендә – Өфө тимер юл ҡулсаһын булдырыу өсөн Дим – Иглин участкаһында икенсе юл төҙөү.

«Башҡортостандың баш ҡалаһын урап уҙыу юлы – «Рәсәй тимер юлдары» менән ғәмәлгә ашырған күләмле проекттарҙың береһе, – тип билдәләне Радий Хәбиров. – Был – Башҡортостандың транспорт инфраструктураһын үҫтереүҙең бик мөһим йүнәлеше, мин Рәсәй тимер юлдары етәкселегенә уртаҡ эштәрҙең яҡшы темптары өсөн рәхмәт белдерәм».

Был проект шулай уҡ баш ҡаланың аэропорт менән тимер юл бәйләнешен ойоштороуҙы ла үҙ эсенә ала, тип өҫтәне республика етксеһе. Өфө ҡулсаһын файҙаланыу башланғас, ҡала халҡы һәм ҡунаҡтары тиҙ һәм уңайлы транспорт төрөнә эйә була. Проектты ғәмәлгә ашырыу 2030 йылға йылына ташыған пассажирҙар һанын 6,5 миллионға тиклем арттырырға мөмкинлек бирергә тейеш.

«Рәсәй тимер юлдары» йәмғиәте идараһы рәйесе – генераль директоры Олег Белозёров республика менән үҙ-ара эш итеүҙе юғары баһаланы.

«Транспорт инфраструктураһын үҫтереүҙә пассажирҙар өсөн уңайлы шарттар булдырырға тырышабыҙ. Башҡортостан менән хеҙмәттәшлек итеү билдәләнгән пландарҙы уңышлы тормошҡа ашырырға мөмкинлек бирә, – тине ул. – Шул уҡ ваҡытта оҙайлы ваҡытҡа иҫәпләнгән эш перспективаларын күреү мөһим».

Автор:Азат Ғиззәтуллин