Финанс һорауҙары буйынса баш ҡала вице-мэры Гөлнара Вәлиева мәрхүм булды

15 октябрҙә Өфө ҡалаһы хакимиәте башлығының беренсе урынбаҫары, финанс идаралыҡ начальнигы Гөлнара Вәлиева 49 йәшендә вафат булды. Баш ҡала мэрияһынан хәбәр итеүҙәренсә, вице-мэр COVID-19 менән ауырығандан һуң өҙлөгөүҙән донъя менән хушлашҡан.

Гөлнара Вәлиеваны һуңғы юлға оҙатыу 16 октябрҙә иртәнге сәғәт 9-ҙа башланасаҡ. Матәм митингы Ҡала мәҙәниәт һарайында (Өфө, Октябрь проспекты, 137) уҙасаҡ.

Гөлнара Вәлиева 1972 йылдың 4 февралендә Стәрлетамаҡ районының Мырҙаш ауылында тыуған. Стәрлетамаҡ технология техникумын, Бөтә Рәсәй ситтән тороп уҡыу финанс-иҡтисади институтын, Башҡортостан Президенты ҡарамағындағы Башҡорт дәүләт хеҙмәте һәм идаралығы академияһы «иҡтисад» һәм «юриспруденция» һөнәрҙәре буйынса тамамлаған. Эшен 1990 йылда Стәрлетамаҡ ҡала финанс бүлегендә ревизор-инспектор булып башлаған. Аҙаҡтан Стәрлетамаҡ ҡала хакимиәте башлығының иҡтисади һәм финанс һорауҙары буйынса урынбаҫары – финанс идаралыҡ начальнигы вазифаһына тиклем үрләгән. Был эштә ул 2011 йылдан алып 20217 йылда Өфө ҡалаһы хакимиәтенә күсерелгәнгә тиклем булған.

«Башинформ» агентлығы мәрхүмәнең яҡындары һәм туғандарының ауыр ҡайғыһын уртаҡлаша.