Өфө мэрының яңы урынбаҫары барлыҡҡа килде, баш ҡала матбуғат хеҙмәте бөтөрөлдө

Өфө ҡала Советы депутаттары ултырышта Башҡортостандың баш ҡалаһы хакимиәте башлығының мәғлүмәт-аналитика бүлеге һәм матбуғат хеҙмәте һорауҙары менән шөғөлләнгән урынбаҫар вазифаһын бөтөрөргә ҡарар ҡылды. Шул уҡ мәлдә ҡала мэры урынбаҫары вазифаһын башҡарыусы Артур Ғафаровтың тәҡдиме буйынса депутаттар биләмәләрҙе комплекслы үҫтереү һорауҙары буйынса вице-мэр вазифаһын индерҙе һәм биләмәләрҙе комплекслы үҫтереү, төҙөлөш эшмәкәрлеген координациялау идаралыҡтарын булдырҙы.

Ултырышта ҡала төҙөү контроле һәм рөхсәттәр биреү бүлеген Өфө ҡалаһы хакимиәте структураһынан алыу, уның функцияларын Төҙөлөш эшмәкәрлеген координациялау идаралығына күсереү тураһында ҡарар ҡабул ителде.

Ҡала Советы депутаттары артабан мэрияның матбуғат хеҙмәтен, мәғлүмәт-аналитика бүлеген берләштереп, Киң мәғлүмәт саралары менән мөнәсәбәт итеү идараһына күсерҙе. Уны Өфө ҡалаһы хакимиәте башлығының гражданлыҡ йәмғиәте, кадрҙар тәьминәте, йәштәр сәйәсәте һәм спорт менән мөнәсәбәт буйынса урынбаҫары етәкләйәсәк.