Радий Хәбиров Ҡаҙағстанда йәшәгән яҡташтарыбыҙ менән осрашты

«Дуҫлыҡ һәм үҙ-ара аңлашыу мөхите милләт-ара мөнәсәбәттәрҙең гармониялы үҫешенә булышлыҡ итә, – тине Радий Хәбиров. – Белеүегеҙсә, беҙ башҡорт телен үҫтереү менән әүҙем шөғөлләнәбеҙ, бының өсөн заманса һанлы технологияларҙы ҡулланабыҙ. Йыл ярымда телде өйрәнеүселәрҙең әҙерлек кимәле төрлө булыуын иҫәптә тотоп, 12 мобиль ҡушымта булдырҙыҡ. Бөтәһен дә еңел генә күсереп алырға мөмкин. Минең телефонымда ла ошондай бер нисә ҡушымта бар».

«Бөгөн Нур-Солтанда Башҡортостан Конгресс-бюроһының Ҡаҙағстандағы вәкиллеге офисын астыҡ. Асылда был – тышҡы иҡтисади һәм мәҙәни-гуманитар хеҙмәттәшлекте үҫтереү өсөн майҙансыҡ, – тине Радий Хәбиров. – Уның бурыстарының береһе – Ҡаҙағстанда йәшәгән башҡорттарға ярҙам итеү».

«Башҡортостан Башлығы менән аралашыу – беҙҙең өсөн ҙур ғорурлыҡ, – тине Урал Аҙнабаев. – Беҙҙең «Аҡбуҙат» этномәҙәни берекмәһе 2017 йылда ойошторолдо. Ҡаҙағстан халыҡтары ассамблеяһы сараларында әүҙем ҡатнашабыҙ, башҡорт мәҙәниәте кисәләре, байрамдар, күргәҙмәләр уҙғарабыҙ, башҡорт фильмдарын күрһәтәбеҙ, спорт турнирҙары ла ситтә ҡалмай, Йәштәр менән әүҙем эшләйбеҙ. Киләсәктә йәкшәмбе мәктәбе һәм уҡ атыу буйынса спорт клубы асырға уйыбыҙ бар. Эшебеҙҙә Рәсәйҙең Ҡаҙағстандағы илселеге, шулай уҡ Башҡортостан дәүләт власы органдарының ярҙамын тоябыҙ».