Ринат Бәширов Башҡортостандың һаулыҡ һаҡлау кураторы итеп тәғәйенләнде

Башҡортостан башлығы хакимиәте етәксеһе урынбаҫары Ринат Бәширов бөгөндән республиканың һаулыҡ һаҡлау кураторы итеп тәғәйенләнде. Был хаҡта хөкүмәттәге оператив кәңәшмәлә республика етәксеһе Радий Хәбиров белдерҙе.

Хәҙер уның бурысы – республика Һаулыҡ һаҡлау министрлығы, шулай уҡ дәүләт һаулыҡ һаҡлау системаһының медицина ойошмалары эшмәкәрлеген контролдә тотоу, республика хөкүмәте һәм Ҡулланыусыларҙың хоҡуҡтарын яҡлау һәм кеше именлеге өлкәһендә күҙәтеү буйынса федераль хеҙмәттең Башҡортостан Республикаһы идаралығы менән үҙ-ара эш итеү.

«Асылда, беҙ һеҙгә берлектә эшләү өсөн ышаныслы ярҙамсы ебәрәбеҙ, — тип мөрәжәғәт итте Радий Хәбиров республика Һаулыҡ һаҡлау министрлығы башлығы Максим Забелинға. — Министрлыҡта ағымдағы эштәр күбәйҙе һәм мин һаулыҡ һаҡлауҙың башҡа тармаҡтарын ҡулдан ысҡындырырбыҙ тип ҡурҡам. Беҙҙә кешеләр ауырымай тормай: инфаркттар ҙа, яман шештәр ҙә бар. Һеҙгә планлы операцияларҙы туҡтатмаҫҡа тигән ҡарар ҡабул итеүегеҙ өсөн бик рәхмәтлемен. Шуға күрә һеҙгә көндәлек эшмәкәрлеккә иғтибар итергә кәрәк, ә коронавирусҡа ҡағылышлы эште ойоштороу өсөн Ринат Бәширов барлыҡ кәрәкле вәкәләттәргә эйә. Мин шундай бойороҡҡа ҡул ҡуйҙым».

http://www.bashinform.ru/news/1445985-kuratorom-zdravookhraneniya-bashkirii-naznachen-rinat-bashirov-/