Шаварш Карапетян Башҡортостан башлығы кәңәшсеһе итеп тәғәйенләнде

Шаварш Карапетян йәмәғәт башланғысында Башҡортостан Республикаһы башлығы кәңәшсеһе итеп тәғәйенләнде. Радий Хәбиров тейешле бойороҡҡа ҡул ҡуйҙы, тип хәбәр итте республика башлығының матбуғат хеҙмәте.

Яңы кәңәшсенең бурысы – Башҡортостанда физкультураны һәм спортты үҫтереү.

Белешмә. Карапетян Шаварш Владимирович 1953 йылдың 19 майында Әрмән ССР-ының Кировакан ҡалаһында тыуған.

Әрмән дәүләт физик культура институтын, Ереван халыҡ хужалығы институтын тамамлаған. 1970 йылдарҙа донъяла һыу аҫтында йөҙөү буйынса иң көслөләрҙең береһе. 1972 йылдан – СССР-ҙың йыйылма командаһында. 1973-1977 йылдарҙа – ете тапҡыр СССР чемпионы, 1973-1980 йылдарҙа 15 тапҡыр СССР Кубогын алған, 1972-1977 йылдарҙа – 13 тапҡыр Европа чемпионы, 1972-1977 йылдарҙа – 50 метрға сумыу, 100, 400 һәм 800 метрға акваланг менән йөҙөү кеүек ярыш төрҙәрендә 11 тапҡыр донъя рекордсмены.

1983 йылда спортта ғәҙеллекте һәм намыҫлылыҡты символлаштырған ЮНЕСКО Fair Play почёт билдәһенә лайыҡ булған. «Почёт билдәһе» ордены, Батырлыҡ ордены, «Һыуға батып барыусыларҙы ҡотҡарған өсөн» миҙалы менән бүләкләнгән.

Ҡояш системаһының 3027-се бәләкәй планетаһына Шаварш исеме бирелгән.