Республика Дәүләт Йыйылышының тағы бер депутаты ваҡытынан алда вәкәләттәрен һала

ӨФӨ, 2019 йыл, 25 сентябрь. /«Башинформ» мәғлүмәт агентлығы, Гөлфиә Акулова/. Кесаҙна, 26 сентябрҙә, республика парламентының пленар ултырышында «Берҙәм Рәсәй» вәкиле Суфия Зидиханованың депутат вәкәләттәрен ваҡытынан алда һалыуы тураһында ҡарар ҡабул итеү күҙаллана, тип хәбәр итә Башҡортостан Республикаһы Дәүләт Йыйылышының матбуғат хеҙмәте.

Зидиханованың депутат корпусын үҙ теләге буйынса ҡалдырыуы әйтелә.

Мандат «Берҙәм Рәсәй»ҙә ҡала. Уны яңы депутатҡа тапшырыу мәсьәләһе тиҙ арала хәл ителер, тине парламент спикеры Константин Толкачев.

Иртәгә Дәүләт Йыйылышы шулай уҡ ЛДПР-ҙан Айгөл Хәнәфинаның вәкәләттәрен ваҡытынан алда һалыуы тураһында ҡарар ҡабул итә.

Зидиханова Суфия Биктимер ҡыҙы 1954 йылдың 26 декабрендә Стәрлетамаҡ районының Кесе Аллағыуат ауылында тыуған. Мәскәү ситтән тороп совет сауҙаһы институтын тамамлаған. 1999-2002 йылдарҙа — «Башкиновидеопрокат» дәүләт ижади-производство идаралығының Салауат ҡала киновидеоселтәре» муниципаль учреждениеһы директоры. 2002 йылдан — Салауат ҡалаһында «Ағиҙел» мәҙәниәт һәм ял үҙәге директоры. Бынан алдағы бишенсе саҡырылыш Дәүләт Йыйылышы депутаты итеп һайланды.