«Антидебаттар» форматы аудиторияла ҙур ҡыҙыҡһыныу тыуҙыра – Эльвира Айытҡолова

ӨФӨ, 2019 йыл, 6 сентябрь. /«Башинформ» мәғлүмәт агентлығы/. Башҡортостан Дәүләт Йыйылышы — Ҡоролтай рәйесе урынбаҫары Эльвира Айытҡолова «Антидебаттар» сәйәси ток-шоуына үҙ фекерен белдерҙе.

«Антидебаттар»ҙы Инстаграмда ҡараным, күренеүенсә, формат аудиторияла ҙур ҡыҙыҡһыныу тыуҙырҙы. Эфир дуҫтар, коллегалар, туғандар менән осрашыуҙа һөйләшеүҙең төп темаһына әүерелгәс, шуға инандым», — тип билдәләне депутат.

Айытҡолова һүҙҙәренсә, иң әҙерлекле һәм ышаныслы кандидат Радий Хәбиров ине.

«Уның тура эфирҙағы асыҡ дискуссияға килергә хәл итеүе — властың асыҡлығын күрһәтеүҙән тыш, республиканың проблемаларын, иң мөһиме, уларҙы хәл итеү юлдарын белеүенә ышаныуы тип уйлайым», — тине Айытҡолова.

Бынан алда «Башинформ» агентлығы 5 сентябрҙә республика каналдарының тура эфирында Башҡортостан тарихында тәүге тапҡыр төбәк башлығы вазифаһына һигеҙ кандидаттың бер майҙансыҡта осрашыуы һәм йәмәғәтселек, һайлаусылар менән үҙ пландары, ҡаҙаныштары менән бүлешеүе тураһында хәбәр иткәйне. «Антидебаттар»ҙа ҡатнашыусылар: Радий Хәбиров – «Берҙәм Рәсәй» партияһы, Юрий Игнатьев – «Ғәҙел Рәсәй», Зөлфиә Ғайсина – «Яблоко» партияһы, Иван Сухарев – ЛДПР, Юнир Ҡотлоғужин – КПРФ, Владимир Кобзев – «Социаль ғәҙеллек өсөн Рәсәй пенсионерҙар партияһы», Владимир Барабаш – «Гражданлыҡ көсө» һәм Рәфис Ҡадиров – «Рәсәй патриоттары».