Башҡортостанда йәшәүселәрҙе «Һайла, Өфө!» фотоконкурсында ҡатнашырға саҡыралар

ӨФӨ, 2019 йыл, 21 август. /«Башинформ» мәғлүмәт агентлығы/. Башҡортостандың баш ҡалаһында «Һайла, Өфө!» фотоконкурсы башланды. Һәр кемдең биш шәп бүләктең береһен отоу мөмкинлеге бар: төп приз — iPhone XS, шулай уҡ бүләк фондында: iPad, Apple Watch смарт-сәғәте, смарт-телевизор һәм Power Bank. Ҡатнашыу өсөн конкурстың «Бәйләнештә»ге рәсми төркөмөнән конкурс башланыуы тураһында яҙмаға репост эшләргә, һуңынан 8 сентябрҙә һайлау участкаһында үҙеңде тауыш биреү процесында фотоға төшөрөп, шул уҡ көндә уны киске сәғәт 9-ға тиклем #ҺайлаӨфө, #ӘйҙәҺайлаӨфө хэштегтары менән сәхифәңә һалырға кәрәк.

Был йәмәғәт башланғысын ҡаланың сауҙа ойошмалары әүҙем күтәреп алды һәм рәсми партнерҙар-бағыусылар булып сығыш яһаны. Фотоконкурсҡа йомғаҡ 10 сентябрҙә «Бәйләнештә» социаль селтәрендә конкурстың рәсми төркөмөнөң тура эфирында яһала. Конкурсты ойоштороусылар — Өфөнөң Йәмәғәт палатаһы һәм ҡала Советы ҡарамағындағы йәмәғәт палатаһы.