«Башҡортостан лидерҙары» кадрҙар проекты финалсыларына дәүләт хеҙмәтендә эш тәҡдим итәләр

ӨФӨ, 2019 йыл, 9 август. /«Башинформ» мәғлүмәт агентлығы/. Өфөлә 10 августа «Торатау» конгресс-холында сағыу, заманса һәм һәләтле идарасылар табыу өсөн республика Башлығы Хакимиәте башланғысы менән үткәрелгән «Башҡортостан лидерҙары» кадрҙар проектының «Идара итеү командаһы 2020-2025» конкурсы финалсыларын билдәләйҙәр. Ойоштороусылар хәбәр итеүенсә, 195 кеше ярымфиналға сыҡҡан.

Көн дауамында улар баһалау сараларында ҡатнашырға, команда менән дә, үҙаллы ла эшләргә тейеш. Ярымфинал барышында ҡатнашыусыларға конкурс остаздары советы алдында үҙҙәренең проекттары менән таныштырыу мөмкинлеге ҡаралған. Проекттың презентацияһы ярымфиналда ҡатнашыу өсөн мотлаҡ шарт түгел, баһалағанда ҡатнашыусыға өҫтәмә балл бирмәй. Әммә был — үҙеңдең проектың хаҡында һөйләү, эксперт баһаһын, уны тормошҡа ашырғанда ярҙам алыу мөмкинлеге.

Конкурстың төп бүләге — дәүләт структураларында етәкселек эше тураһында тәҡдим, уны 50 ҡатнашыусы алырға тейеш.

Ҡатнашыусының уртаса йәше — 34. Иң өлкәненә 45 йәш. Ир-егеттәр 83% тәшкил итә. Ҡатнашыусыларҙың 75% — Өфөнән. Ярымфиналсыларҙың 12% дәүләт хеҙмәтендә эшләй, 8% — ҡаҙылма байлыҡтар сығарыу һәм эшкәртеү, 12% финанс эшмәкәрлеге менән шөғөлләнә, 7% төҙөлөштә мәшғүл, 15% — сәнәғәтселәр. Ҡатнашыусыларҙың 5% — мәғариф һәм тәрбиә биреү, 4% — фән, 6% медицина өлкәһенән.