Радий Хәбиров Волга буйы федераль округында экологик белем һәм тәрбиә буйынса куратор итеп тәғәйенләнде

ӨФӨ, 2019 йыл, 26 апрель. /«Башинформ» мәғлүмәт агентлығы/. Рәсәй Президентының Волга буйы федераль округындағы тулы хоҡуҡлы вәкиле ҡарамағындағы Советы эшсе төркөмөнөң беренсе ултырышында округтың дәүләт власы органдарының ҡаты коммуналь ҡалдыҡтар менән эш итеү өлкәһендәге эшмәкәрлеге тикшерелде.

Түбәнге Новгород өлкәһе губернаторы Глеб Никитин һәм Башҡортостан Башлығы вазифаһын ваҡытлыса башҡарыусы Радий Хәбиров Рәсәйҙең Тәбиғәт, Төҙөлөш министрлыҡтары, Федерация Советы һәм башҡа профилле ойошмаларҙың вәкилдәрен тыңланы. Төп мәсьәләне ике блокка бүлергә хәл ителде. Беренсеһе (Волга йылғаһын экологик һауыҡтырыу, ҡала ситтәрендә рөхсәтһеҙ сүплектәрҙе бөтөрөү йәһәтенән материалдар әҙерләү) өсөн Түбәнге Новгород өлкәһе губернаторы яуап бирә, ә Башҡортостан етәксеһе экологик мәҙәниәт формалаштырыу, экологик белем һәм тәрбиә биреүҙе үҫтереү өсөн яуаплы, тип белдерҙеләр Рәсәй Президентының Волга буйы федераль округындағы тулы хоҡуҡлы вәкиленең матбуғат хеҙмәтендә.

«Беҙ ҡараған мәсьәлә Рәсәй Федерацияһы Президентының 2018 йылдың 7 майындағы 204-се Указында билдәләнгән маҡсаттарға һәм бурыстарға ирешеү менән бәйле. Совет ултырышында әҙерлек барышында беҙ ошо йүнәлештәр буйынса округтағы эштәр торошон анализларға, системалы проблемаларҙы асыҡларға һәм уларҙы хәл итеү тәҡдимдәрен әҙерләргә тейешбеҙ», — тип билдәләне дәүләт башлығының Волга буйы федераль округындағы тулы хоҡуҡлы вәкиле урынбаҫары Алексей Кузьмицкий.

2019 йылдың июнендә Өфөлә ҡаты көнкүреш ҡалдыҡтары менән эш итеү мәсьәләләре буйынса тулы хоҡуҡлы вәкил ҡарамағындағы эшсе төркөмдөң ултырышы була.

«Башинформ» агентлығы хәбәр иткәнсә, Башҡортостан Башлығы вазифаһын ваҡытлыса башҡарыусы Радий Хәбиров сүп-сарҙы айырым йыйырға саҡырҙы.