Берҙәм рәсәйҙәр праймеризына Радий Хәбировтың дәғүәселәре — Дәүләт Думаһы депутаты һәм Күмертау башлығы

ӨФӨ, 2019 йыл, 11 апрель. /«Башинформ» мәғлүмәт агентлығы, Азат Ғиззәтуллин/. «Берҙәм Рәсәй»ҙең төбәк бүлексәһе бөгөн сәйәси совет президиумы ултырышында алдан тауыш биреүҙә ҡатнашыу өсөн кандидаттарҙың исемлеген раҫланы. Уға Башҡортостан Башлығы вазифаһын ваҡытлыса башҡарыусы Радий Хәбиров, Дәүләт Думаһы депутаты Зариф Байғусҡаров, Күмертау ҡалаһы башлығы Борис Беляев һәм «Рәсәй терәге»нең төбәк бүлексәһе етәксеһе Ләйсән Николаева инде.

Берҙәм рәсәйҙәр кандидаттарҙың урындағы һәм беренсел бүлексәләрҙең секретарҙары менән осрашыуҙар графигын да раҫланы. Улар 13 апрелдә Үрге Ҡыйғы ауылында, 27 апрелдә — Учалыла, 18 майҙа — Өфөлә, 29 майҙа Нефтекамала уҙа. Осрашыуҙар барышында «Берҙәм Рәсәй»ҙән Башҡортостан башлығы вазифаһына дәғүә итеүселәр үҙҙәренең идеялары һәм сәйәси программалары менән таныштыра. Уларҙа партияның беренсел ойошмаһы секретарҙары — бөтәһе 2000-дән ашыу кеше ҡатнаша.

8 июндә төбәк бүлексәһенең конференцияһы була, унда «Берҙәм Рәсәй»ҙән республика башлығы вазифаһына кандидат билдәләнергә тейеш.