Ирек Ялалов рәсми рәүештә Башҡортостандан сенатор булды

ӨФӨ, 2018 йыл, 3 октябрь. /«Башинформ» мәғлүмәт агентлығы/. Өфө хакимиәтенең элекке башлығы Ирек Ялалов рәсми рәүештә Башҡортостандан сенатор булды. Федерация Советы рәйесе Валентина Матвиенко уға Федераль Йыйылыштың юғары палатаһының 443-сө ултырышында Федерация Советы ағзаһы танытмаһын тапшырҙы.

Ирек Ялалов ағымдағы йылдың сентябрендә республиканан Федерация Советының бынан алдағы ағзаһы Рафаил Зинуровтың биш йыллыҡ ваҡыты тамамланғандан һуң эш башлаған ике сенаторҙың береһе булды. Ул халыҡ-ара эштәр буйынса комитетта тора ине.

Сентябрҙә үткән һайлау йомғаҡтары буйынса билдәләнгән «Берҙәм Рәсәй» партияһынан Ирек Ялаловтың кандидатураһын Башҡортостан Республикаһы Дәүләт Йыйылышы – Ҡоролтай депутаттары хупланы. Өфө ҡалаһы хакимиәтенең элекке башлығының ниндәй комитетта эшләйәсәге әлегә хәбәр ителмәй. Был федератив ҡоролош, төбәк сәйәсәте, урындағы үҙидара комитеты булыр, моғайын. Сөнки унда торлаҡ-коммуналь хужалыҡ буйынса ярҙамсы комитет бар.

Федерация Советында Башҡортостандан Лилиә Ғүмәрова ла эшләүен дауам итә. Ул фән, мәғариф һәм мәҙәниәт комитеты рәйесе урынбаҫары вазифаһын биләй. Уның вәкәләттәре 2019 йылдың сентябрендә тамамлана.

http://www.bashinform.ru/news/1219945-irek-yalalov-ofitsialno-stal-senatorom-ot-bashkirii-/