Башҡортостан һәм Өфө яңылыҡтары
92.26
-0.33
99.71
-0.56
86.97
-0.03
-3 °C
Болотло
Бөтә яңылыҡтар
Сәйәсәт
1 Октябрь 2018, 15:08

Башҡортостан Дәүләт Йыйылышының дүрт комитетын элекке министрҙар етәкләй

Олег Яровиков
Олег Яровиков
ӨФӨ, 2018 йыл, 1 октябрь. /«Башинформ» мәғлүмәт агентлығы, Наталья Овчарук/. Республика Башлығы Указы менән дүрт элекке министр алтынсы саҡырылыш Дәүләт Йыйылышы — Ҡоролтайҙа яңы вазифаларға тәғәйенләнде. Был турала Рөстәм Хәмитов республика Хөкүмәтендәге оператив кәңәшмәлә белдерҙе.
Башҡортостан Хөкүмәте премьер-министрының элекке урынбаҫары Николай Хорошилов республика парламентының торлаҡ сәйәсәте һәм инфрасруктура үҫеше буйынса комитеты рәйесе итеп тәғәйенләнде; элекке торлаҡ-коммуналь хужалыҡ министры Сергей Афонин Дәүләт Йыйылышының тышҡы үҙидара, гражданлыҡ йәмғиәте институттарын үҫтереү комитеты рәйесе вазифаһын биләне. Быға тиклем Йәштәр сәйәсәте һәм спорт министрлығын етәкләгән Андрей Иванюта мәғариф, мәҙәниәт, йәштәр сәйәсәте һәм спорт буйынса комитет рәйесе урынбаҫары вазифаһын алды.
Башҡортостандың элекке финанс министры Рида Собханҡолова бюджет, һалым, инвестиция сәйәсәте һәм мөлкәт мөнәсәбәттәре буйынса комитетты етәкләй. Хәлил Рәхимов, Башҡортостан Республикаһы Дәүләт Йыйылышы депутаты итеп һайланғас, сәнәғәт, инвестиция һәм инновация сәйәсәте министры урынбаҫары вазифаһынан бушатылды һәм Башҡортостан Дәүләт Йыйылышының сәнәғәт, инновацион үҫеш, сауҙа, эшҡыуарлыҡ һәм туризм буйынса комитеты рәйесе итеп һайланды.
«Дәүләт Йыйылышы — Ҡоролтайҙағы һигеҙ комитеттың дүртәүһен Хөкүмәттәге коллегаларыбыҙ етәкләй. Улар һуңғы йылдарҙа һеҙҙең менән бергәләп тормошҡа ашырған сәйәсәтте алып барыр тип ышанам», — тип билдәләне төбәк Башлығы.
Рөстәм Хәмитов Указдары менән Фәнзил Сыңғыҙов Башҡортостан Хөкүмәте Премьер-министры урынбаҫары һәм Руслан Хәбибов республиканың йәштәр сәйәсәте һәм спорт министры итеп тәғәйенләнде.
http://www.bashinform.ru/news/1218632-chetyre-komiteta-gossobraniya-bashkirii-vozglavili-byvshie-ministry/
Читайте нас: