Ирек Ялалов Башҡортостан парламентынан Федерация Советы ағзаһы итеп тәғәйенләнде

ӨФӨ, 2018 йыл, 28 сентябрь. /«Башинформ» мәғлүмәт агентлығы, Гөлфиә Акулова/. Ирек Ялалов Башҡортостан Республикаһының алтынсы саҡырылыш Дәүләт Йыйылышы — Ҡоролтайҙан Рәсәй Федерацияһы Федераль Йыйылышының Федерация Советы ағзаһы итеп тәғәйенләнде. Тейешле ҡарар республика парламенты ултырышының беренсе яңы саҡырылышында күпселек тауыш менән ҡабул ителде.

«Берҙәм Рәсәй» партияһы ағзаһы, Дәүләт Йыйылышы депутаты Ирек Ялаловтың кандидатураһы «Берҙәм Рәсәй» сәйәси партияһының Генераль Советы Президиумы ҡарары һәм Башҡортостан Республикаһы Дәүләт Йыйылышы — Ҡоролтайҙағы «Берҙәм Рәсәй» фракцияһы тәҡдиме буйынса Рәсәй Федерацияһы Конституцияһының 95-се статьяһына һәм «Рәсәй Федерацияһы Федераль Йыйылышының Федерация Советын формалаштырыу тәртибе тураһында» федераль закондың 3-сө статьяһына ярашлы фекер алышыуға сығарылды, тип хәбәр итте Башҡортостан Республикаһы Дәүләт Йыйылышы спикеры Константин Толкачев. Кандидатура күпселек тауыш менән хупланды.

Константин Толкачев Ирек Ялаловты вәкәләттәргә эйә булыуы менән ҡотлап, Башҡортостан һәм тотош Рәсәй мәнфәғәте өсөн уңышлы эшләүен теләне.

http://www.bashinform.ru/news/1217803-chlenom-soveta-federatsii-ot-parlamenta-bashkirii-naznachen-irek-yalalov/