Игорь Комаров Волга буйы федераль округы төбәктәренең милли проекттарҙың маҡсатлы күрһәткестәренә өлгәшеүгә әҙерлеген тикшерә

ӨФӨ, 2018 йыл, 14 сентябрь. /«Башинформ» мәғлүмәт агентлығы/. Рәсәй Федерацияһы Президентының 2018 йылдың 7 майындағы «2024 йылға тиклемге осорға Рәсәй Федерацияһын үҫтереүҙең милли маҡсаттары һәм стратегик бурыстары тураһында»ғы Указында билдәләнгән илдең иҡтисади һәм социаль өлкәһен үҫтереүҙең төп өҫтөнлөктәрен үтәү өсөн төбәк кимәлендә етди ойоштороу һәм йөкмәткеле эш башҡарылырға тейеш. Рәсәй Президентының Волга буйы федераль округындағы Тулы хоҡуҡлы вәкиле Игорь Комаров округ төбәктәренең баш федераль инспекторҙары менән эш осрашыуында ошо хаҡта белдерҙе. Тулы хоҡуҡлы вәкил һүҙҙәренсә, төбәктәргә эш сәфәрҙәре барышында ул мөһим мәсьәләләрҙең береһен: дәүләт власының төбәк органдарының Рәсәй Федерацияһы Президенты Указының положениеларын тормошҡа ашырыуға һәм федераль милли проекттарҙың маҡсатлы күрһәткестәренә өлгәшеүен тәьмин итеүгә әҙерлеген тикшерергә ниәтләй.

Граждандарҙың социаль хәленә бәйле өҫтөнлөклө йүнәлештәргә, шулай уҡ төбәктәр иҡтисадына: һаулыҡ һаҡлау, мәғариф, торлаҡ төҙөлөшө һәм ҡала мөхитенең нисек үҫешеүенә, экологияға, төҙөлөшкә һәм юлдарҙы ремонтлауға, экспортты үҫтереүгә айырыуса иғтибар биреү күҙаллана.

Рәсәй Президенты Указын тормошҡа ашырыуҙы финанс яҡтан тәьмин итеү мәсьәләләре айырым ҡарала.

Игорь Комаров баш федераль инспекторҙарҙың, шул иҫәптән Башҡортостан буйынса баш федераль инспектор Мизаил Закомалдиндың докладтарын тыңланы.

Волга буйы федераль округы төбәктәрендә һайлау кампанияларына йомғаҡ яһап, тулы хоҡуҡлы вәкил Башҡортостанда уҙған һайлау кампанияһына айырым туҡталды, республикала Дәүләт Йыйылышы – Ҡоролтай депутаттары һайланды, тип хәбәр иттеләр Башҡортостан буйынса баш федераль инспекторҙың матбуғат хеҙмәтенән.

«Волга буйында һайлау ойошҡанлы һәм тыныс үтте. Халыҡтың үҙ ихтыярын белдереү һөҙөмтәләренә йоғонто яһарға һәләтле хоҡуҡ боҙоуҙар билдәләнмәне», — тине Игорь Комаров.

http://www.bashinform.ru/news/1210528-igor-komarov-proverit-gotovnost-regionov-pfo-dostich-tselevykh-pokazateley-natsproektov/