Дәүләт Думаһы пенсия алдынан эштән бушатҡан өсөн енәйәт яуаплылығы «өсөн» сығыш яһаны

ӨФӨ, 2018 йыл, 14 сентябрь. /«Башинформ» мәғлүмәт агентлығы, Наталья Овчарук/. Дәүләт Думаһы депутаттары беренсе уҡыуҙа рәсәйҙәрҙе пенсия алды йәшендә (пенсияға биш йыл ҡалғас) эшкә алыуҙан баш тартҡан йәки нигеҙһеҙ эштән ебәргән өсөн енәйәт яуаплылығы тураһында закон проектын ҡараны. Бының өсөн 200-360 мең һум штраф һалыу йәки 360 сәғәткә тиклем мәжбүри эштәр тәғәйенләү тәҡдим ителә, тип яҙа РИА «Новости».

Рәсәй Федерацияһы Федераль Йыйылышының түбәнге палатаһының өс фракцияһы: «Берҙәм Рәсәй», «Ғәҙел Рәсәй», ЛДПР закон проектын тәүге уҡыуҙа хупланы. Коммунистар ҡаршы сығыш яһаны.

Хәтерегеҙгә төшөрәбеҙ, 2018 йылдың июлендә Дәүләт Думаһы депутаттары пенсияға сығыу йәшен ир-егеттәргә — 65-кә, ҡатын-ҡыҙҙарға 63-кә тиклем арттырыу өсөн тауыш бирҙе. Һуңынан ил Президенты Владимир Путин халыҡҡа видеомөрәжәғәт менән сығыш яһап, реформаны йомшартыу: хаҡлы ялға сығыу йәшен ҡатын-ҡыҙҙарға — 60, ә и-егеттәргә 65 йәштән билдәләү тураһында хәбәр итте. Шулай уҡ дәүләт башлығы социаль ярҙам сараларын индерергә: пенсия алды йәшендәге кешеләргә — эшһеҙлек буйынса пособиены арттырырға, ә эш биреүселәргә эштән бушатҡан өсөн енәйәт яуаплылығы вәғәҙә итте.

http://www.bashinform.ru/news/1210903-gosduma-vystupila-za-ugolovnoe-nakazanie-za-uvolnenie-pered-pennsiey/