Башҡортостанда «Берҙәм Рәсәй»ҙең алдан тауыш биреүе тамамланды

ӨФӨ, 2018 йыл, 4 июнь. /«Башинформ» мәғлүмәт агентлығы, Гөлфиә Акулова/. Башҡортостанда «Берҙәм Рәсәй»ҙең алдан тауыш биреүе тамамланды. Ойоштороу комитеты яҡынса һөҙөмтәләрҙе 5 июндә раҫлай һәм партияның Генераль советына килешеүгә ебәрә.

«Берҙәм Рәсәй» сәйәси партияһы Башҡортостан төбәк бүлексәһенең һуңғы мәғлүмәттәре буйынса, халыҡтың 13,4% һайлауға килде. Тәүге тапҡыр электрон тауыш биреү уҙғарылды, республикала 15 мең самаһы кеше ошо хоҡуҡ менән файҙаланды. Партияның төбәк бүлексәһе секретары Константин Толкачев билдәләүенсә, алдан тауыш биреү процедураһы — асыҡ процесс.

«Республикала йәшәүселәр Башҡортостан республикаһы Дәүләт Йыйылышы – Ҡоролтайға һайлауҙа «Берҙәм Рәсәй» партияһынан күрһәтелергә лайыҡлы тип һанаған кандидаттар өсөн тауыш бирҙе. Төбәк башҡарма комитеты, урындағы партия бүлексәләре алдан тауыш биреүҙе үткәреү өсөн ҙур эш башҡарҙы. Тауыштарҙы иҫәпләгәндән һуң, партияның Генераль советы берҙәм һайлау округы һәм бер мандатлы һайлау округтары буйынса «Берҙәм Рәсәй» партияһынан депутатлыҡҡа кандидаттар исемлеген раҫларға тейеш. Был кандидаттарҙы төбәк бүлексәһе конференцияһы күрһәтә. «Берҙәм Рәсәй» партияһынан Башҡортостан Республикаһы Дәүләт Йыйылышы – Ҡоролтайға депутатлыҡҡа кандидаттар һаны 223 кешенән артмай», — тине Константин Толкачев.

5-се һайлау округы буйынса алдан тауыш биреүҙә ҡатнашҡан Республика Башлығы Рөстәм Хәмитов үҙ округында иң күп тауыш йыйҙы.

http://www.bashinform.ru/news/1168906-v-bashkortostane-zaversheno-predvaritelnoe-golosovanie-edinoy-rossii/