Башҡортостанда зыян күргән өлөшсөләр реестрында 3200 самаһы кеше

ӨФӨ, 2018 йыл, 17 апрель. /«Башинформ» мәғлүмәт агентлығы, Ғәлиә Нәбиева/. Ошо көндәрҙә Башҡортостан Дәүләт Йыйылышы – Ҡоролтайҙа алданған өлөшсөләр темаһына фекер алышыу булды. Парламентарийҙар граждандарҙың хоҡуҡтарын яҡлау сараларын тикшерҙе.

«2011 йылдан алып был саралар 3200 самаһы кеше зыян күргән 28 объект буйынса мәсьәләне хәл итергә мөмкинлек бирҙе, — тип яҙҙы төбәк парламенты спикеры Константин Толкачев социаль селтәрҙәге сәхифәһендә. — Ләкин әлеге ваҡытта зыян күргәндәр реестрында 33 объект буйынса 1400-ҙән ашыу граждан иҫәпләнә».

Хөкүмәт һәм вәкәләтле органдар мәсьәләләрҙе хәл итергә кәрәклеген аңлай, тамамланмаған 33 төҙөлөш буйынса юл карталары әҙерләнгән, тип билдәләне Константин Толкачев.

«Мин Дәүләт Йыйылышы депутаттарына юл карталарын ғәмәлгә ашырыуҙы күҙәтергә, эшсе төркөмдәр составында проблемалы объекттарға барырға, өлөшсөләрҙең инициатив төркөмдәре менән бәйләнештә булырға ҡуштым, — тине Константин Толкачев. — Алдағы бер-ике йылда яңы алданған өлөшсөләрҙең барлыҡҡа килеүенә юл ҡуймайынса, был теманы көн тәртибенән алырға кәрәк. Бер үк ваҡытта өлөшләтә төҙөлөштән проектлы финанслауға этаплап күсеү күҙаллана. Был осраҡта яуаплылыҡты граждандар түгел, ә төҙөүселәр һәм банктар үҙ өҫтөнә ала».

http://www.bashinform.ru/news/1144805-v-bashkirii-v-reestre-postradavshikh-dolshchikov-okolo-3200-chelovek-/