Константин Толкачев 47 дәүләт парламентарийын Рәсәйҙең милли сәйәсәте менән таныштырҙы

ӨФӨ, 2018 йыл, 29 март. /«Башинформ» мәғлүмәт агентлығы, Әлим Фәйезов/. Башҡортостан Республикаһы Дәүләт Йыйылышы — Ҡоролтай рәйесе Константин Толкачев Страсбургта Европа Советының урындағы һәм төбәк властары конгресының пленар сессияһында «Төбәктәр берҙәйлеге һәм милли дәүләттең бөтөнлөгө» темаһына доклад менән сығыш яһаны. Башҡортостан парламенты рәйесе 47 илдән килгән коллегаларын Рәсәйҙең этностарҙың берҙәйлеген, телен һәм милләтен һаҡлауға йүнәлтелгән милли сәйәсәте хаҡында һөйләне.

Күп этностар коэффициенты буйынса Рәсәй Европала беренсе урынды биләй, тип билдәләне Константин Толкачев. Ул Европа парламентарийҙарын Башҡортостандағы милли сәйәсәт үҙенсәлектәре менән дә таныштырҙы.

«Был — илебеҙҙең үҙенсәлекле этник, конфессиональ составы һәм бай ресурс потенциалы булған ҙур субъекттарының береһе. Республикабыҙҙа 160 милләт вәкиле йәшәй. Рәсәйҙә төбәктәрҙең берҙәйлеген һаҡлау өсөн байтаҡ эштәр башҡарыла тип әйтә алам», — тине Башҡортостан парламенты рәйесе.

Константин Толкачев һуңғы йылдарҙа республикала граждандарҙың телен һәм мәҙәниәтен ирекле үҫтереүгә конституция хоҡуҡтарын бойомға ашырыу механизмдарын булдырған закондар ҡабул ителгәнлеге хаҡында һөйләне, Башҡортостан мәктәптәрендә 15 туған телде өйрәнеү ойошторолғанлығын билдәләне.

«Рәсәй Федерацияһының башҡа этно-территориаль берәмектәрендә лә ошондай тәжрибә бар. Субъекттар үҙҙәренең берҙәйлеген һаҡлау йүнәлешендә әүҙем эшләй. Шул уҡ ваҡытта дөйөм федераль киңлектә урынлашҡан төбәктәр, дөйөм Рәсәй һәм төбәк мәнфәғәттәре араһында тигеҙлеккә өлгәшеүгә булышлыҡ итеп, дәүләтселекте нығытыуға ҙур өлөш индерә», — тип һыҙыҡ өҫтөнә алды Константин Толкачев.

http://www.bashinform.ru/news/1136229-konstantin-tolkachev-poznakomil-parlamentariev-47-gosudarstv-s-natsionalnoy-politikoy-rossii/