Константин Толкачев Рәсәйҙең төбәк парламенттары башлыҡтары рейтингында алтынсы урынға күтәрелде

ӨФӨ, 2018 йыл, 12 март. /«Башинформ» мәғлүмәт агентлығы, Гөлфиә Акулова/. 2018 йылдың февраль айы йомғаҡтары буйынса, Башҡортостан Республикаһы Дәүләт Йыйылышы — Ҡоролтай рәйесе Константин Толкачев Рәсәй Федерацияһы субъекттарының закон сығарыу органдары башлыҡтары медиарейтингында алтынсы урынды алды. Республика парламентының матбуғат үҙәгенән хәбәр итеүҙәренсә, 2017 йылдың феврале менән сағыштырғанда ул алты баҫҡысҡа күтәрелгән.

Константин Толкачев, Ҡырым, Санкт-Петербург, Татарстан, Мәскәү һәм Иркутск өлкәләрендәге коллегаларынан ғына ҡалышып, Рәсәй төбәктәрендәге парламент етәкселәрен уҙып китте. Исемлектә Константин Толкачевтан һуң Мәскәү, Дағстан, Төмән һәм Новосибирск өлкәләре парламенттары етәкселәре килә.

Медиарейтинг тураһында мәғлүмәттәрҙе 2003 йылдан алып рейтинг тикшереүҙәре менән шөғөлләнгән «Медиалогия» компанияһы иғлан итте. Рейтинг 3 600-гә яҡын сығанаҡты: ТВ, радио, гәзит-журналдар, мәғлүмәт агентлыҡтары, интернеттағы киң мәғлүмәт саралары, шулай уҡ 800 миллион самаһы соцмедиа сығанаҡтарын үҙ эсенә алған «Медиалогия» системаһының киң мәғлүмәт саралары базаһы нигеҙендә төҙөлгән.