Башҡортостанда Президентлыҡҡа кандидаттар һәм сәйәси партиялар агитация өсөн ваҡыт бүлде

ӨФӨ, 2018 йыл, 13 февраль. /«Башинформ» мәғлүмәт агентлығы, Ғәлиә Нәбиева/. Башҡортостанда Рәсәй Президенты вазифаһына кандидаттар һәм уларҙы күрһәткән сәйәси партиялар өсөн бушлай эфир ваҡыты бүленде. Йәрәбәне төбәк Үҙәк һайлау комиссияһы башлығы Хәйҙәр Вәлиев асып ебәрҙе. Ул һайлау кампанияһының сираттағы этабы һәм киң мәғлүмәт сараларында агитация үткәреү ҡағиҙәләре тураһында һөйләне. Бушлай ваҡыт һигеҙ теркәлгән кандидат һәм уларҙы күрһәткән ете сәйәси партия араһында бүленде.

Сәйәси партия вәкилдәре һәм кандидаттарҙың ышаныслы кешеләре Башҡортостан республикаһында таратыу менән «Рәсәй-1» һәм «Рәсәй-24» телеканалдарында, «Рәсәй радиоһы», «Маяҡ», «Вести ФМ» радиоканалдарында, Башҡортостан юлдаш телевидениеһында, «Юлдаш», «Спутник ФМ» радиоканалдарында ваҡытты бүлеп алды.

«Һәр телерадиоканалға авгитация уҙғарыу өсөн 510 минут ваҡыт бүленә. Рәсәй Президентын һайлауҙа бушлай агитация осоро 19 февралдә башлана һәм 16 мартҡа тиклем дауам итә. Эфир ваҡытының яртыһы, 255 минут, кандидаттарға уртаҡ агитация саралары, мәҫәлән, дебаттар, өстән бер өлөшө кандидаттар күрһәткән сәйәси партияларға агитация материалдарын ҡуйыуға бүленә һәм ҡалған өлөшө – 85 минут кандидаттарға һайлау алды агитация роликтары урынлаштырыу өсөн бирелә», — тип һөйләне партия вәкилдәренә «Башҡортостан» дәүләт телерадиокомпанияһының баш юрисконсультанты.

Шыбаға тартыу барышында Үҙәк һайлау комиссияһы вәкилдәре һайлау алды агитацияһы сиктәрендә булған сикләүҙәр хаҡында хәтергә төшөрҙө. Улар иҫәбендә – икенсе кандидатҡа ҡарата кире фекер әйтеү, агитация материалдарында бәлиғ булмағандарҙың һүрәттәрен ҡулланыу, милли һәм дини ыҙғыш тыуҙырыу тыйыла.

Теләһе бер кандидат уртаҡ агитация сараларын уҙғарыуҙан баш тарта ала, әммә бынан башҡа кандидаттарҙың эфир ваҡыты кәмемәйәсәк, ә уның ваҡыты был уртаҡ сарала ҡатнашыусылар араһында бүленәсәк.

Агитация материалының йөкмәткеһе тыйыуға инһә, телерадиокомпаниялар кандидаттарға хәбәр итә һәм үҙгәрештәр индерергә кәңәш бирә. Бәхәс килеп тыуғанда, һәр аныҡ осраҡты Үҙәк һайлау комиссияһының мәғлүмәти бәхәстәр буйынса эшсе төркөмө тикшерә.

http://www.bashinform.ru/news/1116274-v-bashkirii-kandidaty-v-prezidenty-i-politicheskie-partii-podelili-vremya-dlya-agitatsii/