Лилиә Ғүмәрова Рәсәй һәм Азербайжан араһында дипломатик мөнәсәбәттәр урынлаштырыуҙың 25 йыллығына бағышланған күргәҙмәлә сығыш яһаны

ӨФӨ, 2018 йыл, 8 февраль. /«Башинформ» мәғлүмәт агентлығы, Наталья Овчарук/. Башҡортостандан сенатор, Федерация Советының Фән, мәғариф һәм мәҙәниәт комитеты рәйесенең беренсе урынбаҫары Лилиә Ғүмәрова Рәсәй һәм Азербайжан араһында дипломатик мөнәсәбәттәр урынлаштырыуҙың 25 йыллығына бағышланған күргәҙмәлә сығыш яһаны.

«Дипломатик мөнәсәбәттәр урынлаштырыуҙан алып, 25 йыл эсендә ғәйәт ҙур юл үтелде. Бөгөн яңы үҙ-ара хеҙмәттәшлек этабына сығабыҙ тип әйтергә була. Сәйәсәттә, иҡтисадта һәм гуманитар өлкәлә хеҙмәттәшлек әүҙем нығына, әммә иң мөһиме – иҡтисадтағы һәм мәҙәниәттәге бәйләнештәр ике ил халыҡтары араһында дуҫтарса аралашыуға күскәндә кеше бәйләнештәрен урынлаштырыу», — тине сенатор.

Бөгөн Азербайжан коллегалары менән берлектә мәғариф, фән һәм мәҙәниәт өлкәһендә хеҙмәттәшлек бара, тип билдәләне Лилиә Ғүмәрова. Миҫалға, Бакула асылған Мәскәү дәүләт университеты филиалы, Сеченов исемендәге Беренсе Мәскәү дәүләт медицина университетының Бакула филиалын асыу проекты.

«Миҫал итеп, IV Баку халыҡ-ара гуманитар форумы йомғаҡтарын килтереү ҙә етерлек. Унда 400-ҙән ашыу делегат, 14 Нобелев премияһы лауреаты, бер нисә халыҡ-ара ойошма етәкселәре ҡатнашты. Форумда Федерация Советы Рәйесе етәкләгән Рәсәй делегацияһында кеше ғәҙәттәгесә күп булды, — тип билдәләне парламентарий. — Рәсәй һар саҡ Азербайжан менән төбәк-ара хеҙмәттәшлек һөҙөмтәлелеген арттырыу өсөн сығыш яһаны һәм шулай дауам итә. Бик яҡшы үҙ-ара эшмәкәрлек тәжрибәһе тупланған, бындай ихтыяжлы форматты артабан да үҫтерергә кәрәк».

http://www.bashinform.ru/news/1114163-liliya-gumerova-vystupila-na-vystavke-v-chest-25-letiya-ustanovleniya-diplomaticheskikh-otnosheniy-m/