Республиканың тәбиғәттән файҙаланыу һәм экология министры Шихандар менән нимә буласағын һөйләне

ӨФӨ, 2017 йыл, 22 декабрь. /«Башинформ» мәғлүмәт агентлығы, Дарья Петрова/. Башҡортостан Республикаһы Дәүләт Йыйылышы – Ҡоролтайҙа «Башҡортостан экологияһы һәм тәбиғәт ресурстары» темаһына «хөкүмәт сәғәте» үтте. Парламентарийҙарҙың сираттағы ултырышында Башҡортостан Башлығы Рөстәм Хәмитов та ҡатнашты.

Парламентарийҙарҙың республиканың тәбиғәттән файҙаланыу һәм экология министры Илдар Һаҙыевҡа биргән һорауҙарҙың береһе Стәрлетамаҡ Шихандарының статусына ҡағылды. Ведомство етәксеһенән тәбиғәт ҡомартҡыларын сәнәғәт эшкәртеүенә тапшырыу мөмкинлеге тураһында һоранылар.

«Әйтеп үтергә кәрәк, бөгөн төбәк тәғәйенләнешендәге ҡомартҡылар, уларҙың яҙмышы республика ҡулында. Бер ниндәй федераль орган да Шихандарҙың яҙмышын хәл итә алмай. Республиканың ҡарашы бына шундай: улар тәбиғәт ҡомартҡылары булды, бар һәм буласаҡ. Бөгөн уларҙан ҡомартҡы статусын алыу тураһындағы һорау законға дәлилләнмәгән. Федераль, республика ҡануниәтендә тәбиғәт ҡомартҡыһы статусын бөтөрөү механизмы юҡ, — тип аңлатма бирҙе Илдар Һаҙыев. – Махсус һаҡланған тәбиғәт биләмәләре һәм ҡомартҡылары өлкәһендә экологик закондар иҡтисад ҡанундарынан өҫтөн. Шуға күрә статусты алыу мөмкин түгел, эшкәртеүгә тапшырыу өсөн хоҡуҡи нигеҙ юҡ».

http://www.bashinform.ru/news/1096125-ministr-prirodopolzovaniya-i-ekologii-bashkirii-rasskazal-chto-budet-s-shikhanami/