Башҡортостанда Халыҡтар берҙәмлеге көнөнөң байрам программаһы иғлан ителде

ӨФӨ, 2017 йыл, 26 октябрь. /«Башинформ» мәғлүмәт агентлығы, Ғәлиә Нәбиева/. Халыҡтар берҙәмлеге көнөнә арналған республика байрамы 2017 йылдың 4 ноябрендә көндөҙгө сәғәт 3-тә «Башҡортостан» дәүләт концерт залында уҙа. Сара барышында милли кейемдәрҙә йөрөү, күргәҙмә һәм интерактив майҙансыҡтарҙың эше, республиканың профессиональ һәм үҙешмәкәр ижади коллективтарының концерты ҡаралған, тип хәбәр иттеләр Башҡортостан Республикаһы халыҡтары ассамблеяһынан.

Шул уҡ көндә киске сәғәт 6-ла ҙур мәҙәни сара – «Сәнғәт төнө-2017» Бөтә Рәсәй мәҙәни акцияһы башлана. Унда музейҙар, китапханалар, клубтар, театрҙар, филармониялар һәм башҡа мәҙәниәт учреждениелары ҡатнаша. Акцияның төп темаларының береһе – Халыҡтар берҙәмлеге көнө. Мәҙәниәт һәм сәнғәт учреждениелары байрамдың тарихына, тарихта һәм хәҙерге заманда Башҡортостандың һәм Рәсәйҙең берҙәмлегенә арналған күмәк саралар тәҡдим итә.

2017 йылдың 3 ноябрендә, Халыҡтар берҙәмлеге көнө алдынан, илдең һәр төбәгендә икенсе тапҡыр «Ҙур этнографик диктант» Бөтә Рәсәй акцияһы ойошторола. Башҡортостанда 12 майҙансыҡ эшләйәсәк. Диктант халыҡтың этнографик белемен, уларҙың Рәсәйҙә йәшәгән халыҡтар тураһында белеү кимәлен баһаларға мөмкинлек бирәсәк һәм этник-ара мөнәсәбәттәрҙе яйға һалыуҙа мөһим урын биләгән фән булараҡ этнографияға иғтибарҙы йәлеп итәсәк.