Рәсәйҙең Үҙәк һайлау комиссияһы республиканың Үҙәк һайлау комиссияһы башлығы вазифаһына кандидатты билдәләне

ӨФӨ, 2017 йыл, 21 июнь. /«Башинформ» мәғлүмәт агентлығы, Ғәлиә Нәбиева/. Рәсәйҙең Үҙәк һайлау комиссияһы Башҡортостан Үҙәк һайлау комиссияһының әлеге башлығы Хәйҙәр Вәлиевты яңы срокка һайларға тәҡдим итте. Ошо хаҡта ҡарар бөгөн Мәскәүҙә һайлауҙы ойоштороусыларҙың ултырышында ҡабул ителде. Рәсәй Үҙәк һайлау комиссияһының 12 ағзаһы был ҡарарҙы хупланы, берәүһе тауыш бирмәне. Башҡортостандың Үҙәк һайлау комиссияһы яңы составта беренсе ултырышҡа 27 июндә, элекке комиссияның вәкәләттәре ваҡыты тамамланғас, йыйыла. Был ултырышта алдағы биш йылға ведомство етәксеһен билдәләү бурысы тора.

Башҡортостанда Үҙәк һайлау комиссияһының яңы составы һайланды. Республика Башлығы үҙенең указы менән Үҙәк һайлау комиссияһының алты ағзаһын тәғәйенләне. Башҡортостан Дәүләт Йыйылышы депутаттары ла республиканың Үҙәк һайлау комиссияһының хәл иткес тауышҡа эйә алты ағзаһын раҫланы.

Яңы состав 2017 йылдың 26 июнендә Үҙәк һайлау комиссияһы вәкәләттәренең ваҡыты үтеүгә бәйле һайланды. Һайлауҙар тураһында федераль һәм төбәк ҡануниәтенә ярашлы, яңы составтағы Башҡортостан Үҙәк һайлау комиссияһына хәл иткес тауышҡа эйә 12 ағза инә.

Республика һайлау комиссияһы ағзаларының яртыһын — Дәүләт Йыйылышы, икенсе яртыһын Башҡортостан Башлығы тәғәйенләй. Шуның менән бергә Дәүләт Йыйылышы ла, республика Башлығы ла Рәсәйҙең Үҙәк һайлау комиссияһы тәҡдимдәре нигеҙендә һайлау комиссияһына берҙән дә кәм булмаған ағза тәғәйенләргә тейеш.

Бынан алда Рәсәйҙең Үҙәк һайлау комиссияһы республика Башлығына хәҙерге рәйес Хәйҙәр Вәлиевты яңы составтағы төбәк комиссияһы ағзаһы итеп тәғәйенләргә, Дәүләт Йыйылышына иһә ғәмәлдәге составтағы комиссия секретары Марина Долматованы тәҡдим иткәйне.