Башҡортостанда «Таҙа ҡулдар» тигән коррупцияға ҡаршы акция башланды

ӨФӨ, 2017 йыл, 19 июнь. /«Башинформ» мәғлүмәт агентлығы, Ғәлиә Нәбиева/. Башҡортостанда «Таҙа ҡулдар» тигән коррупцияға ҡаршы акция уҙғарыла. Ул «Берҙәм Рәсәй» партияһының сираттағы проекты сиктәрендә тормошҡа ашырыла. Туймазы ҡалаһында партияның беренсел бүлексәләре секретарҙары өсөн зона уҡыу семинарында Башҡортостандың Дәүләт Йыйылышы рәйесе Константин Толкачев ошо хаҡта һөйләне.

Акция барышында республика муниципалитеттары хакимиәттәре башлыҡтары һәм депутаттарының килеме, сығымы һәм мөлкәт характерындағы йөкләмәләре тураһында мәғлүмәттәрҙең дөрөҫлөгөн тикшерәләр. Мәғлүмәттәрҙең ысынбарлыҡҡа тап килмәүе асыҡланһа, мәсьәләне партияның төбәк сәйәси советында ҡарайҙар, һуңынан уны республика башлығы хакимиәтенә ебәрәләр.

«Коррупцияға ҡаршы көрәшкә Рәсәй Президенты етди иғтибар бүлә. Ришүәтселеккә ҡаршы көрәш буйынса аныҡ сараларҙы коллегаларыбыҙ менән апрелдә Санкт-Петербургта Рәсәй Федерацияһының Закон сығарыусылар советы ултырышында тикшергәйнек инде. Тәҡдимдәребеҙҙе илдең юғары етәкселеге хупланы, – тип билдәләне Константин Толкачев. – Бөтә ерҙә, бөтә законлы көстәр һәм саралар, шул иҫәптән сәйәси партиялар эсендә ошондай акциялар менән коррупцияға ҡаршы көрәш алып барыу зарур. Закон сығарыу кимәлендә республикала ошо йүнәлештә етди аҙымдар яһайбыҙ. Мәҫәлән, Дәүләт Йыйылышының һуңғы ултырышында «Башҡортостан Республикаһында Контроль-иҫәп палатаһы тураһында»ғы законға үҙгәрештәр ҡабул иттек».

Төбәк парламенты спикеры һүҙҙәренсә, «тиҙҙән коррупцияға ҡаршы көрәшеү маҡсатында урындағы үҙидара өлкәһендәге бер нисә республика законына үҙгәрештәр индереү планлаштырыла». Был норматив акттар вазифалы кешеләрҙең килеме һәм сығымы хаҡында мәғлүмәттәр биреү мәсьәләләре менән бәйле.