Башҡортостан делегацияһы IV «ЭКСПО-2017» Рәсәй-Ҡытай форумында ҡатнаша

ӨФӨ, 2017 йыл, 15 июнь. /«Башинформ» мәғлүмәт агентлығы, Гөлфиә Акулова/. Башҡортостан Хөкүмәте Премьер-министры урынбаҫары – Хөкүмәт Аппараты етәксеһе Илшат Тажетдинов етәкселегендәге республика делегацияһы IV «ЭКСПО-2017» Рәсәй-Ҡытай форумында ҡатнаша. Форум төньяҡ-көнсығыш Ҡытайҙағы Хэйлунцзян провинцияһының административ үҙәге Харбинда 28-се Харбин халыҡ-ара сауҙа-иҡтисади йәрминкәһе менән бер ваҡытта бара.

Беренсе тапҡыр ошондай йәрминкә 1990 йылда булғайны, шунан бирле йыл һайын үткәрелә. Ул Ҡытай Халыҡ Республикаһы һәм Рәсәй өсөн мөһим ике яҡлы сауҙа-иҡтисади сара булып тора. Тап ошо йәрминкә нигеҙендә Рәсәй-Ҡытай ЭКСПО – дәүләт кимәлендәге күргәҙмәләр майҙансығы булдырылды.

Республикабыҙ вәкилдәре Сычуань провинцияһының вице-губернаторы Жчу Хэсинь етәкселегендәге рәсми делегация менән осрашты. Яҡтар сауҙа-иҡтисади, фәнни-техник һәм гуманитар өлкәләрҙә хеҙмәттәшлек мәсьәләләрен тикшерҙе. Берлектәге проекттарҙы тормошҡа ашырыу мөмкинлектәре ҡаралды. Ҡытай партнерҙары Башҡортостанда ғәмәлгә ашырыу өсөн яңы инвестиция проекттарын – Сычуань провинцияһының Лэшань ҡалаһы инвесторҙары ҡатнашлығында төҙөлөш материалдарын етештерергә, туристик йүнәлеште үҫтерергә тәҡдим итте.