Башҡортостанда пенсионерҙар, инвалидтар һәм күп балалылар бушлай юридик ярҙам аласаҡ

ӨФӨ, 2017 йыл, 31 май. /«Башинформ» мәғлүмәт агентлығы, Ғәлиә Нәбиева/. Башҡортостанда дәүләт юридик бюроһы эшләмәгән пенсионерҙарға, өсөнсө төркөм инвалидтарына, хәрби хәрәкәт ветерандарына, сәйәси репрессиялар ҡорбандарына, күп балалы йәки яңғыҙ ата-әсәгә бушлай юридик ярҙам күрһәтәсәк. Техноген һәләкәттәр һөҙөмтәһендә радицияға дусар булғандар, шулай уҡ «Рәсәйҙең почетлы доноры» һәм «СССР-ҙың почетлы доноры» билдәләре менән бүләкләнгәндәр өсөн дә льготалар ҡаралған. Башҡортостан Дәүләт Йыйылышының профилле комитеты депутаттары тәүге уҡыуҙа тейешле закон проектын ҡараны.

Республика закон сығарыусылары бушлай квалификациялы юридик ярҙам алыуға граждандарҙың исемлеген киңәйтеү буйынса үҙ хоҡуғы менән файҙаланды. Был федераль ҡануниәттә күҙ уңында тотолған, тип хәбәр иттеләр Дәүләт Йыйылышының матбуғат хеҙмәтендә.

Дәүләт төҙөлөшө, хоҡуҡ тәртибе һәм суд мәсьәләләре буйынса комитет ултырышында биш суд участкаһының мировой судьяһы вазифаһына тәғәйенләү өсөн кандидатуралар ҡаралды. Парламентарийҙар Дәүләт Думаһына хәрби бурыс тураһындағы федераль законға төҙәтмәләр индереү буйынса башланғысты хупланы.