Республика парламенты спикеры Валентина Матвиенконың бәлиғ булмағандарға ҡаршылыҡ акцияларында ҡатнашыуҙы тыйыу тураһында тәҡдимен хупланы

ӨФӨ, 2017 йыл, 24 май. /«Башинформ» мәғлүмәт агентлығы, Ғәлиә Нәбиева/. Башҡортостандың Дәүләт Йыйылышы Рәйесе Константин Толкачев Федерация Советы спикеры Валентина Матвиенконың бәлиғ булмағандарға ҡаршылыҡ акцияларында ҡатнашыуҙы тыйыу тураһында тәҡдимен хупланы.

«Валентина Матвиенконың бәлиғ булмағандарға ҡаршылыҡ акцияларында ҡатнашыуҙы тыйыу хаҡында фекере менән ризамын. Бынан тыш, Дәүләт Йыйылышында балаларҙы партия билдәһе буйынса иртә сәйәсәтләштереүҙе тыйған федераль закон өҫтөндә эш бара, — тип билдәләне Константин Толкачев. — Был йәштә илһөйәрлек кенә берҙән-бер идеология булыуы мөмкин. Балалар сәйәси лозунгтар менән мауығырға түгел, ә уҡырға тейеш. Тормош тәжрибәһе булмағанлыҡтан, уларға сәйәси ареналарҙа барған ваҡиғаларға объектив баһа биреү ауырыраҡ».