Башҡорт телендә дебаттар буйынса тәүге чемпионатта дүрт ораторҙар командаһы көс һынашты

ӨФӨ, 2017 йыл, 24 май. /«Башинформ» мәғлүмәт агентлығы, Ғәлиә Нәбиева/. Башҡорт телендә дебаттар буйынса тәүге чемпионатта дүрт ораторҙар командаһы көс һынашты. Ойоштороусыларға ғариза биргән 16-нан 30 йәшкә тиклемге һәр кем туған телендә сығыш яһай алды. «Һүҙ бәйгеһе»ндә дүрт команда ҡатнашты. Башҡорт телен мәктәптәрҙә мотлаҡ предметтар исемлегенә индерергә кәрәкме, эске туризмды үҫтереү мөһимме, һәм йәмғиәттең ниндәй формаһы яҡшыраҡ: матриархатмы әллә патриархатмы кеүек төрлө темаларға фекер алышыуҙар булды. Чемпионатты ойоштороусы — Башҡортостан Республикаһының Йәш Гвардияһы.

Күптәрҙең бындай ярыштарҙа беренсе тапҡыр ҡатнашыуына ҡарамаҫтан, һәр команда лайыҡлы сығыш яһаны.

«Дебаттар интеллектуаль уйын ғына түгел, белемде байытыусы эшмәкәрлек төрө булараҡ та билдәләнә, — тип аңлатма бирҙе Йәш Гвардияның төбәк штабы етәксеһе Люция Юлуева. — Дебат уйындарында әүҙем ҡатнашыу студент йәштәрҙең интеллектуаль ял формаларын популярлаштырыуға булышлыҡ итә, төрлө яҡлап үҫешеү өсөн мөһим фактор булып тора».

Еңел булмаған бәхәстә «Урал аръяғы» командаһы — алтын, «БайГаф» — көмөш, «Бөркөт» бронза миҙалға лайыҡ булды.