Владимир Путин һәм Дмитрий Медведев 2025 йылға тиклем иҡтисад үҫешен тикшерҙе

ӨФӨ, 2017 йыл, 22 май. /«Башинформ» мәғлүмәт агентлығы/. Рәсәй Премьер-министры Дмитрий Медведев ил президенты Владимир Путинды 2017-2025 йылдарға хөкүмәттең эш планы менән таныштырҙы. «2019-2020 йылдар осоронда иҡтисадыбыҙҙың үҫеше уртаса донъя һәм унан юғарыраҡ кимәлгә сығырға тейеш. Ул иҡтисадҡа тиҙерәк үҫешергә һәм төп социаль мәсьәләләрҙе хәл итергә мөмкинлек бирәсәк», — тип доклад яһаны Дмитрий Медведев.

Ил Президенты билдәләүенсә, «бер ниндәй шәхестәргә лә, хатта эске сәйәси графикка ҡарамайынса, илебеҙҙең асыҡ һәм аңлайышлы иҡтисадты һәм социаль өлкәне үҫтереү планы булырға тейеш». Тейешле план өҫтөндә эксперт төркөмдәр ҙә эшләүен иҫкә төшөрҙө ул. «Әммә Рәсәй Федерацияһы Хөкүмәте башҡарған эш, һис шикһеҙ, бөтә тәҡдимдәр нигеҙендә эшләнергә тейеш», — тине Владимир Путин. Ул Премьер-министрға хөкүмәттең идеяларын, һуңынан төп вариантты һайлар өсөн эксперттарҙың әҙер эштәрен тикшерергә ҡушты.